დიდი ბრიტანეთი უკრაინას დამატებით 100 000 000 (130 მილიონი დოლარი) ფუნტი სტერლინგის ღირებულების სამხედრო აღჭურვილობას უგზავნის. იარაღებს შორისაა საზენიტო რაკეტა Starstreak, 800 ტანკსაწინააღმდეგო ყუმბარა და სხვა.

ამის შესახებ ბრიტანეთის პრემიერმინისტრმა, ბორის ჯონსონმა გერმანიის კანცლერთან, ოლაფ შოლცთან ერთად გამართულ პრესკონფერენციაზე ისაუბრა. მისივე ცნობით, ცნობით, უკრაინა ასევე მიიღებს დამატებით ჩაფხუტებს, ღამის ხედვის მოწყობილობასა და ჯავშანჟილეტებს.

როგორც Politico წერს კითხვაზე, გაგზავნის თუ არა ბრიტანეთი საკუთარ ტანკებსა და ჯავშანმანქანებს კიევში, ჯონსონმა უპასუხა — "პრინციპულად თანახმა ვარ, განვიხილო ნებისმიერი თავდაცვითი იარაღის გაგზავნა იმისათვის, რომ უკრაინელებმა შეძლონ საკუთარი თავისა და საკუთარი ხალხის დაცვა".

გამოცემის თქმით, ჯონსონმა აღნიშნა ისიც, რომ დასავლეთი ვერ შეძლებს უკრაინას მიაწოდოს ყველა ის იარაღი, რასაც ითხოვენ. გერმანიის კანცლერის თქმით კი, მოკავშირეები უნდა დააკვირდნენ, რის გამოყენებას შეძლებს უკრაინა ეფექტურად.