პოლონეთიდან 45 რუსი დიპლომატის გაძევების საპასუხოდ, კრემლი 45 პოლონელ დიპლომატს აძევებს. რუსეთის საგარეო საქმეთა სამინისტრომ დიპლომატები პერსონა ნონ გრატად გამოაცხადა.

როგორც CNN რუსეთის საგარეოზე დაყრდნობით წერს, შესაბამისი ნოტა რუსეთში პოლონეთის ელჩს უკვე გადაეცა. დიპლომატებმა რუსეთის ტერიტორია 13 აპრილს დღის ბოლომდე უნდა დატოვონ.

პოლონეთის რესპუბლიკისა და მისი მოკავშირეების მიმართ რუსეთის პოლიტიკიდან გამომდინარე, ასევე უკრაინის წინააღმდეგ რუსული აგრესიის გათვალისწინებით, პოლონეთის შინაგანი უსაფრთხოების სააგენტომ საგარეო საქმეთა სამინისტროს 45 რუსი დიპლომატის ქვეყნიდან გაძევება 23 მარტს მოსთხოვა.

მაშინ რუსეთის საგარეო საქმეთა სამინისტროს სპიკერმა, მარია ზახაროვამ განაცხადა, რომ თუ ვარშავა მსგავს ნაბიჯებს გადადგამდა, მოსკოვი "შესაბამისად" უპასუხებდა.