ისრაელის საგარეო საქმეთა მინისტრი იაირ ლაპიდი გმობს ბუჩაში მომხდარ სისასტიკეს და ომის დანაშაულს უწოდებს. როგორც CNN წერს, ეს ისრაელის მხრიდან ყველაზე მკაცრი განცხადებაა. მინისტრი წერს, რომ კიდევ ერთხელ, დიდი და ძლიერი ქვეყანა შეიჭრა მეზობელ სახელმწიფოში ყოველგვარი გამართლების გარეშე.

"კიდევ ერთხელ, მიწა გაჟღენთილია უდანაშაულო მშვიდობიანი მოსახლეობის სისხლით. კადრები უკრაინიდან შემზარავია. რუსეთის ძალებმა ჩაიდინეს ომის დანაშაული დაუცველი მშვიდობიანი მოსახლეობის წინააღმდეგ. მე მკაცრად ვგმობ ამ სამხედრო დანაშაულებს", — ამბობს ლაპიდი.

ისრაელის პრემიერმინისტრმა, ნაფტალი ბენეტმა ასევე დაგმო ბუჩაში მომხდარი სისასტიკე, თუმცა რუსეთი არ დაუდანაშაულებია.

"ჩვენ შოკირებული ვართ ბუჩას კადრებით და ჩვენ მკაცრად ვგმობთ მათ ამას. გამოსახულებები ძალიან მკაცრია. ტანჯვა, რომელიც უკრაინელ ხალხს აწუხებს, უზარმაზარია და ჩვენ ყველაფერს ვაკეთებთ დასახმარებლად", — თქვა პრემიერმინისტრმა.

20 მარტს ზელენსკიმ ისრაელის პარლამენტს მიმართა, სადაც თქვა, რომ "გულგრილობა კლავს". სიტყვით გამოსვლისას, ზელენსკიმ განაცხადა, რომ რუსეთის ქმედებები უკრაინელების მიმართ ჰგავს ნაცისტური გერმანიის ქმედებებს ებრაელების მიმართ. მანვე აღნიშნა, რომ ათიათასობით უკრაინელი ახლა სხვა ქვეყნებში ეძებს უსაფრთხოებას, ისევე, როგორც ადრე ებრაელები.

ზელენსკიმ აღნიშნა, რომ მისი ყოველი სიტყვა პარლამენტარებს გულზე მტკივნეულად ხვდებათ. მისივე თქმით, შუამავლობა სახელმწიფოებს შორისაა შესაძლებელი და არა სიკეთესა და ბოროტებას შორის.

მიმართვამდე, 14 მარტს ისრაელის საგარეო საქმეთა მინისტრმა განაცხადა, რომ ისრაელი რუსეთისთვის სანქციების არიდების გზა არ იქნება. მისივე თქმით, ისრაელი გააკეთებს ყველაფერს, რათა მედიაციის პროცესს ხელი შეუწყოს.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში