როგორც ჩანს, მნიშვნელოვან დაჯილდოებებზე ზოგიერთი ვარსკვლავი სახეში გარტყმის ნაცვლად, განსაკუთრებულ გულისხმიერებას იჩენს და კონკურენტებს ეხმარება. ამის მშვენიერი მაგალითი ლედი გაგაა, რომელმაც გრემის წლევანდელ დაჯილდოებაზე საზოგადოების სიყვარული და პატივისცემა კიდევ ერთხელ დაიმსახურა.

გრემის დაჯილდოებაზე საუკეთესო პოპ შესრულების (დუეტი/ჯგუფი) ნომინაციაში ლედი გაგა და ტონი ბენეტი SZA-ისა Doja Cat-ის დუეტმა დაამარცხა. ჯილდოს მისაღებად SZA სცენისკენ ყავარჯნების დახმარებით გაემართა. მომღერალს გრძელი კაბა ეცვა, რომელიც სიარულისას აიბლანდა. გაგას ბევრი არ უფიქრია, მაშინვე დაიჩოქა და მომღერალს კაბა შეუმჩნევლად შეუსწორა, რათა SZA სცენაზე მშვიდად ასულიყო და გამარჯვებით დამტკბარიყო.

ვიდეოს სოციალურ ქსელებში უამრავი ადამიანი გამოეხმაურა:

"არ მაინტერესებს, რას ფიქრობთ, მაგრამ მგონია, გაგა ძალიან საყვარელია, რადგან ერთადერთი იყო, ვინც SZA-ს დაეხმარა"

"ლედი გაგა SZA-ს სცენაზე დაეხმარა. ქალები სხვა ქალებს მხარს უჭერენ"

ეს გრემის დაჯილდოებაზე გაგას ერთადერთი დასამახსოვრებელი მომენტი არ ყოფილა. მიუხედავად იმისა, რომ ტონი ბენეტთან ერთად გრემი ვერ მოიგო, გაგამ მათი ორი სიმღერა მარტომ მაინც შეასრულა. ტონის ალცჰაიმერი აქვს, რის გამოც დაჯილდოებას ვერ დაესწრო, თუმცა მომღერალი ჩანაწერის დახმარებით წარადგინა. ლედი გაგამ შესრულების ბოლოს ცრემლები ვერ შეიკავა.

ლედი გაგა განსაკუთრებული გულისხმიერებისთვის ოსკარის ცერემონიაზეც შეაქეს. მან საუკეთესო ფილმის ნომინაციაში გამარჯვებული 76 წლის ლაიზა მინელთან ერთად გამოაცხადა, რომელიც ჯანმრთელობის პრობლემების გამო საჯაროდ იშვიათად ჩნდება და ახლაც ძალიან ღელავდა. გაგამ შეძლო, რომ მინელისთვის ეს საღამო და გამარჯვებულის გამოცხადება სასიამოვნო მოგონებად ექცია და მომღერალი შიშებს მარტივად გამკლავებოდა.

ამავე თემაზე:

ოსკარი 2022-ზე ლაიზა მინელის დახმარებისთვის ლედი გაგამ ქება დაიმსახურა