პარტია ლელოს ითხოვს, რუსეთის მიერ ბუჩაში მოქალაქეების მასობრივი ხოცვა-ჟლეტის გამო, 5 აპრილი საქართველოში გლოვის დღედ გამოცხადდეს. ქართულ ოცნებაში ამ ინიციატივის საპასუხოდ ამბობენ, რომ ომის ყველა დღე გლოვისაა.

ლელოს განცხადებით, რუსეთის ქმედება უკრაინაში ცალსახად წარმოადგენს ომის დანაშაულს. მათი თქმით, უკიდურესად მნიშვნელოვანია, რომ დროულად დაიწყოს ბუჩასა და სხვა ქალაქებში მოკლული მშვიდობიანი მოქალაქეების საქმის საერთაშორისო გამოძიების პროცესი.

"ყოველივე ზემოთქმულის გათვალისწინებით ლელო საქართველოსთვის მოითხოვს: პირველი — 5 აპრილი გამოცხადდეს ჩვენი ქვეყნის ტერიტორიაზე გლოვის დღედ რუსეთის საოკუპაციო ძალების მიერ ქალაქ ბუჩასა და უკრაინის სხვა ქალაქებში ჩადენილ სამხედრო დანაშაულებებთან, სისასტიკესთან და მშვიდობიან მოქალაქეთა მკვლელობასთან დაკავშირებით.

მეორე — ხელისუფლებამ გამოიყენოს ყველა საერთაშორისო პლატფორმა, რათა რუსეთმა პასუხი აგოს უკრაინაში ჩადენილი უსასტიკესი დანაშაულებებისათვის, მათ შორის გააგრძელოს და გააძლიეროს ძალისხმევა, რათა ხელი შეუწყოს ჩადენილი დანაშაულების გამოძიებას ჰააგის სასამართლოს მიერ.

მესამე — გაეწიოს აქტიური დახმარება უკრაინის ხელისუფლებას და მოხდეს 2008 წლის ომში რუსეთის მიერ საქართველოში ჩადენილი დანაშაულების დოკუმენტირებისა და სამართალწარმოების მიმართულებით დაგროვილი გამოცდილების გაზიარება", — წერია განცხადებაში.

ამ მოთხოვნის საპასუხოდ, ქართული ოცნება ამბობს, რომ ომის ყველა დღე ომისაა. პარლამენტის თავმჯდომარის, შალვა პაპუაშვილის თქმით, ოპოზიციის ნაწილი საკითხით მანიპულირებას ცდილობს.

"ყოველი დღე ომისაა, რომელიც არის. რა თქმა უნდა ყოველი დღე არის გლოვის დღე. კიდევ ერთხელ არის მცდელობა სამწუხაროდ ოპოზიციის ნაწილის მხრიდან დაიწყონ მანიპულაცია საკითხებით. [...]

ნაციონალური მოძრაობა, რომელიც არის ასეთი ინიციატივის ავტორი ხოლმე, მათ არც უკრაინა აინტერესებთ, არც საქართველო აინტერესებთ და სინამდვილეში არც რეალური თანაგრძნობაც არ აქვთ", — ამბობს პაპუაშვილი.

მას შემდეგ, რაც ქალაქებისა და დასახლებების ნაწილზე უკრაინულმა ჯარებმა კონტროლი დაიბრუნეს, ვრცელდება, როგორც ადგილობრივი, ასევე, საერთაშორისო მედიების გადაღებული ფოტო-ვიდეო მასალა, სადაც ჩანს, რომ ქუჩებში ადამიანების ცხედრებია, მათ ნაწილს ხელები აქვს შეკრული.