პუტინის პრესსპიკერი დმიტრი პესკოვი ამტკიცებს, თითქოს ზელენსკის აკრძალული ინტერვიუს გამოქვეყნების არ ეშინიათ. მისი თქმით, მათ აქვთ კანონები და მნიშვნელოვანია, არ გავრცელდეს ისეთი ინფორმაცია, რომელიც ამ კანონებს არღვევს.

"ჩვენ არ გვეშინია" — უთხრა CNN-ის ჟურნალისტს პესკოვმა.

"ჩვენ გვაქვს კანონები და ძალიან მნიშვნელოვანია, რომ არ გამოვაქვეყნოთ ინფორმაცია, რომელიც ამ კანონების დარღვევას გამოიწვევს", — ამბობს პუტინის პრესსპიკერი.

პესკოვამდე უკრაინის პრეზიდენტი, ვოლოდიმირ ზელენსკი გამოეხმაურა და თქვა, რომ მოსკოვი შეშინებულია მისი ინტერვიუთი რუს ჟურნალისტებთან, რომლებსაც "სიმართლის თქმა შეუძლიათ".

ზელენსკის გუშინ, 27 მარტს ინტერვიუ ჰქონდა რუსული დამოუკიდებელი და კრიტიკული მედიების ჟურნალისტებთან, რომლებსაც კრემლი დევნის. ინტერვიუს დაანონსების შემდეგ, როსკომანდზორმა წინასწარ მოითხოვა მედიებისგან, რომ ის არ გამოექვეყნებინათ.

ინტერვიუ ჩაწერეს Meduza-ს მთავარმა რედაქტორმა, ივან კოლპაკოვმა, ტელეკომპანია დოჟდის მთავარმა რედაქტორმა, ტიხონ ძიადკომ, ჟურნალისტმა და მწერალმა, მიხაილ ზიგარმა (მან ასევე დაუსვა ზელენსკის ერთი შეკითხვა Novaya Gazeta-ს მთავარი რედაქტორისა და ნობელის პრემიის ლაურეატის დიმიტრი მურატოვისგან) და კომერსანტის სპეციალურმა კორესპონდენტმა, ვლადიმერ სოლოვიოვმა.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში