ძმები ჯორჯ და მელვინ დეჯესუსები თითქმის 25-წლიანი პატიმრობის შემდეგ გაათავისუფლეს. ისინი სასჯელს იმ დანაშაულისთვის იხდიდნენ, რომელიც არ ჩაუდენიათ.

"ციხიდან გამოსვლის წუთები ძალიან ჰგავდა გამარჯვების შეგრძნებას, ეს დიდებული იყო", — განუცხადა ჯორჯ დეჯესუსმა ჟურნალისტებს. მისი თქმით, დაახლოებით 24 წელია, რაც ძმა არ უნახავს: ისინი სასჯელს სხვადასხვა დაწესებულებაში იხდიდნენ.

ამდენი წლის შემდეგ კი კვლავ შეხვდებიან ერთმანეთს.

ძმების მრავალი ალიბის მიუხედავად, ისინი 1997 წელს მკვლელობის ბრალდებით გაასამართლეს. ჯორჯსა და მელვინს ვინმე მარგარეტ მიდკიფის მკვლელობაში ედებოდათ ბრალი: ქალი 1995 წელს საკუთარ სახლში იპოვეს გარდაცვლილი.

მრავალი წლის შემდეგ, როცა გამოძიებაში სხვა მტკიცებულებები გამოიკვეთა, გამომძიებლებმა აზრი შეიცვალეს და ძმებისთვის ბრალის მოხსნა მოითხოვეს.

"თქვენი ცხოვრების 25 წელი წაგართვეს და ამას ვეღარაფერი ჩაანაცვლებს. იმედია, ციხის კედლების მიღმა კვლავ შეძლებთ ნორმალური ცხოვრების დაბრუნებას", — უთხრა ძმებს ოკლენდის საოლქო სასამართლოს მოსამართლემ.

ამ საქმის შესახებ გავრცელებულ ინფორმაციაში ნათქვამია, რომ დანაშაულის ადგილას აღებული დნმ-ის მიხედვით, ძმებს მკვლელობასთან არაფერი ესაქმებოდათ. ამის გარდა, არ არსებობდა არანაირი მტკიცებულება, რაც მათი ბრალეულობის გამოსაკვეთად გამოდგებოდა.

თავის დროზე ვინმე ბრენდონ გოჰაგენმა, რომლის დნმ-ის კვალი დანაშაულის ადგილას იპოვეს, გამოძიებას განუცხადა, რომ ერთ-ერთმა ძმამ, მელვინ დეჯესუსმა, აიძულა იგი, მსხვერპლი გაეუპატიურებინა, საბოლოოდ კი, ძმებმა სასიკვდილოდ სცემეს მსხვერპლი, მარგარეტ მიდკიფი. გოჰაგენმა ორივეს წინააღმდეგ ჩვენების მიცემის სანაცვლოდ დანაშაული აღიარა.

თუმცა თითქმის ორი ათწლეულის შემდეგ, 2017 წელს, აღმოჩნდა, რომ გოჰაგენი კიდევ ერთი ქალის გაუპატიურებასა და მკვლელობაში იყო გარეული. მეტიც, ამ სასტიკი დამნაშავის ბრალდებები აქ არ მთავრდება: გამოძიება კიდევ 12 მსხვერპლი ქალის კვალზე გავიდა, რომლებზეც ის ემოციურად, ფიზიკურად და სექსუალურად ძალადობდა.

შესაბამისად, გაირკვა, რომ ძმების საქმეშიც დამნაშავე სწორედ გოჰაგენი იყო.

"მოხარულები ვართ, რომ ჩვენი კლიენტი, მელვინ დეჯესუსი და მისი ძმა, ჯორჯი 25 წლის შემდეგ სრულად გათავისუფლდებიან ამ ბრალდებისგან. ახლა ჩვენ ყურადღებას გავამახვილებთ იმაზე, რომ დავეხმაროთ მელვინ დეჯესუსს, დაუბრუნდეს მის ჩვეულ ცხოვრებას და შეიგრძნოს თავისუფლების გემო", — თქვა ადვოკატმა.

უდანაშაულო ჯორჯსა და მელვინს მხარდაჭერას ძალიან ბევრი სტრუქტურისა და ორგანოს წარმომადგენელი უცხადებს. გენერალური პროკურორის ოფისის თანახმად, გათავისუფლებულ პატიმრებს შეუძლიათ მიიღონ საცხოვრებელი ერთი წლით და სხვადასხვა სერვისზე უფასო ორწლიანი მომსახურება, მათ შორის ტრანსპორტირება, სამუშაო დახმარება და სასწავლო ტრენინგები.

მიჩიგანის შტატში 2016 წელს მიიღეს "უსამართლო პატიმრობის კომპენსაციის აქტი", რომელიც მიზნად ისახავს, უკანონო მსჯავრდადებულებისთვის 50,000 დოლარის ოდენობის კომპენსაციას და სხვა ხარჯების ანაზღაურებას.