რუსმა მომღერალმა ზემფირამ ახალი ვიდეოკლიპი, სახელად Не Стреляйте (არ ისროლო) გამოუშვა, რომლითაც უკრაინას მხარი დაუჭირა და ქვეყანაში რუსეთის შეჭრა გააპროტესტა. ვიდეოკლიპში უკრაინის ომის კადრებს, რუსეთის საპროტესტო აქციებსა და დაკავებულ რუს აქტივისტებს ვხედავთ.

მომღერალმა ბოლო პერიოდში თავისი YouTube-ის არხიდან ყველა ვიდეო წაშალა და მხოლოდ 2008 წელს გამოშვებული სიმღერა, სახელად Вiдпусти, დატოვა. ახლა კი მომღერლის ოფიციალურ YouTube-ის არხს უკრაინის მხარდამჭერი ვიდეოკლიპიც დაემატა.

ამ მომენტში ზემფირას ინსტაგრამის პოსტებიც წაშლილია და მომღერალს მხოლოდ უკრაინის მხარდასაჭერი ახალი ვიდეოკლიპი და შავი კვადრატის ფოტო აქვს განთავსებული, რომელსაც "არა ომს" აწერია.

ფოტო: Instagram

შეგახსენებთ, რომ რუსეთი უკრაინაში 24 თებერვალს შეიჭრა და მეზობელი ქვეყნის წინააღმდეგ სრულმასშტაბიანი ომი წამოიწყო. ომის დაწყებიდან ერთი კვირის შემდეგ მედიაში ინფორმაცია გავრცელდა, რომ ზემფირამ რუსეთი დატოვა.