ირპენში ოკუპანტებმა ჟურნალისტი მოკლეს. ინფორმაცია კიევის პოლიციის უფროსმა, ანდრეი ნებიტოვმა და შინაგან საქმეთა მინისტრის მრჩეველმა ანტონ გერაშენკომ გაავრცელეს.

სოციალურ ქსელებში გავრცელდა გარდაცვლილი ჟურნალისტის პრესბარათი, რომელზეც ეწერა, რომ ის New York Times-ის ჟურნალისტია. ამავეს წერდნენ, როგორც ადგილობრივი, ასევე საერთაშორისო მედიები..

New York Times-მა განცხადება გააკეთა და თქვა, რომ გარდაცვლილი ჟურნალისტი მათთან თანამშრომლობდა წლების განმავლობაში, თუმცა ახლა არ იყო მათი წარმომადგენელი უკრაინაში. მედიის განმარტებით, გავრცელებული ინფორმაცია, რომ ის Times-ის ჟურნალისტი იყო გამოიწვია იმან, რომ ის ატარებდა მათ ბეიჯს, რომელიც წლების წინ დაუმზადეს.

როგორც კიევის პოლიციის უფროსმა თქვა, დაშავებულია კიდევ ერთი ჟურნალისტი. Unian-მა მისი კომენტარი გაავრცელა, რომელიც ყვება, თუ რა მოხდა ადგილზე.

"კოლეგასთან ერთად გავიარე ირპენის პირველი ხიდი, ვცდილობდით მეორემდე მისვლას, რომ გადაგვეღო, როგორ მიდიან ლტოლვილები. ვიღაც დაგვთანხმდა, მივეყვანეთ იმ ადგილამდე, ჩვენ ჩავჯექით მანქანაში და გაგვიხსნეს ცეცხლი. მძღოლი მობრუნდა, რომ გასულიყო ადგილიდან და ამ დროს მე მომხვდა ტყვია. დავინახე, რომ ბრენტ რენო, ჩემი მეგობარიც დაჭრეს კისერში. ამის შემდეგ გავიყავით და არ ვიცი რა შეემთხვა მას. აქ მომიყვანა სასწრაფო სამედიცინო დახმარებამ", — ყვება დაშავებული.