ზანგეზურის დერეფნისთვის საჭირო ავტომაგისტრალი თითქმის 90 პროცენტით მზადაა, ხოლო რკინიგზა — დაახლოებით 70 პროცენტით. ამის შესახებ ცნობებს აზერბაიჯანული მედია ავრცელებს. მათი ინფორმაციით, აზერბაიჯანის პრეზიდენტმა ილჰამ ალიევმა "ზანგეზურის დერეფნის" განხორციელებაზე ისაუბრა, რაც სომხეთის ტერიტორიული მთლიანობის მიმართ პრეტენზიას წარმოადგენს.

"იმედი მაქვს, რომ ეს პროექტი სრულად განხორციელდება უახლოეს მომავალში. ჩვენ ვიცით და ძალიან გვიხარია, რომ თურქეთში ასევე დაიწყო ყარსი-ნახიჩევანის რკინიგზის მშენებლობა. ამრიგად, ამ პროექტების კომბინაცია და კოორდინირებული განხორციელება გახსნის ახალ მნიშვნელოვან საერთაშორისო დერეფანს და გახდება შუა დერეფნის ერთ-ერთი განშტოება.

სარკინიგზო ინფრასტრუქტურა, რომელსაც ჩვენ ვაშენებთ, პირველ ეტაპზე გათვლილი იქნება 15 მილიონი ტონა ტვირთის გადაზიდვაზე. მაგრამ მომავალში ეს მაჩვენებელი შეიძლება გაიზარდოს და, სავარაუდოდ, გაიზრდება კიდეც. თუმცა, ნებისმიერ შემთხვევაში, 15 მილიონი ტონა გამტარუნარიანობის მქონე ახალი დერეფნის გახსნას დიდი მნიშვნელობა აქვს როგორც ჩვენი ქვეყნებისთვის, ასევე უფრო ფართო გეოგრაფიისთვის. და აქ ჩვენ კვლავ ვიკავებთ ძალიან სერიოზულ და პასუხისმგებლიან პოზიციას. ჩვენ უზრუნველვყოფთ საკუთარ ინტერესებს და მსოფლიოსთვის ვხსნით ახალ სატრანსპორტო მარშრუტებს. ანუ, ეს კიდევ ერთხელ აჩვენებს, რომ ჩვენი ქვეყნებისა და ჩვენი ორგანიზაციის მიზანია მშვიდობა, თანამშრომლობა, უსაფრთხოება, ურთიერთპატივისცემა და საერთო ინტერესები", — აღნიშნა აზერბაიჯანის პრეზიდენტმა.