"თითქმის მივედით", — ვკითხულობთ NASA-ს მთვარის მისიის ოფიციალურ გვერდზე.

ამის დაპოსტვის მომენტში Artemis 2-მა უკვე გზის ნახევარი განვლო მთვარისაკენ. როცა დანიშნულების ადგილს მიუახლოვდებიან, ასტრონავტები მთვარეს შემოუვლიან და მის ზედაპირს მეცნიერული მეთოდებით დააკვირდებიან.

პოსტი 4 აპრილს, გამთენიისას, გამოქვეყნდა. სურათზე ხომალდი Orion-ია გამოსახული, შორიდან კი მთვარე მოჩანს. იგი მზის პანელების ერთ-ერთ ფრთაზე დამონტაჟებულმა კამერამ გადაიღო.

შეგახსენებთ, რომ Artemis 2-ის მისია 10-დღიანია. ახლა მისიის მეოთხე დღე მიმდინარეობს. ეს დღე ძირითადად რეპეტიციას დაეთმობა: ეკიპაჟის წევრები იმ საქმეებში ივარჯიშებენ, რომელთა შესრულებაც მთვარესთან მიახლოებისას მოუწევთ. ხომალდი მთვარესთან ყველაზე ახლო წერტილში სულ რაღაც 3 საათს გაატარებს. ასტრონავტებმაც სწორედ ამ დროში უნდა მოასწრონ შესაბამისი დაკვირვებების ჩატარება და აღწერა.

თავისთავად, ეკიპაჟმა ეს დავალებები მიწაზეც არაერთხელ გაიარა, თუმცა რეპეტიცია ნულოვანი გრავიტაციის პირობებშიც აუცილებელია.

ახლა დღის უმეტესი ნაწილი სტანდარტულ ოპერაციებს ეთმობა, მაგალითად, მისიის მართვის ცენტრთან კომუნიკაციასა და ფართო აუდიტორიებთან საუბარს.

ცნობისთვის, Artemis 2-ის ეკიპაჟი მთვარის ზედაპირზე არ დაეშვება, არამედ მას გარშემო შემოუვლის. ადამიანი მთვარეზე ფეხს მისია Artemis 4-ის დროს დადგამს (ნახევარ საუკუნეზე მეტი ხნის შემდეგ პირველად), რომელიც 2028 წლისთვისაა ჩანიშნული. ახლანდელი ფრენა სწორედ ამისთვის მომზადებას ემსახურება.