კვლევითი ცენტრ Russian Field-ის მიერ ჩატარებულ გამოკითხვაში, ჩრდილოეთ კავკასიის ფედერალურ ოლქში რესპონდენტთა 3%-მა საბჭოთა დიქტატორი იოსებ სტალინი რეგიონის იდეალურ ლიდერად დაასახელა, რითაც ის მონაცემთა ბაზაში ყველაზე ხშირად ხსენებული ისტორიული ფიგურა გახდა. სტალინი ჩრდილოეთ ოსეთში 7%-ით, ხოლო დაღესტანში 4%-ით ლიდერობს.

რესპონდენტთა ნაწილმა კი "იდეალური ლიდერის" პოზიტიურ მისაბაძ მაგალითებად ისეთი გამოგონილი დასავლური პერსონაჟები დაასახელა, როგორებიცაა ჰალკი (the Hulk), T-800 "ტერმინატორიდან" და რემბო. Russian Field-ის მიერ ჩატარებული კვლევის შესახებ OC MEDIA წერს.

კვლევაში მონაწილეობდა 2100 რესპონდენტი, რომლებიც სხვადასხვა რეგიონიდან — დაღესტნიდან, ჩეჩნეთიდან, ყაბარდო-ბალყარეთიდან, ყარაჩაი-ჩერქეზეთიდან, ინგუშეთიდან, ჩრდილოეთ ოსეთიდან და სტავროპოლის მხარიდან — შეირჩა.

გამოკითხვის თანახმად, რესპონდენტთა 61%-მა დადებითად შეაფასა თავისი შესაბამისი რეგიონული ლიდერის საქმიანობა.

ჩეჩნეთის ხელმძღვანელი რამზან კადიროვს ჩრდილოეთ კავკასიის ყველა ლიდერს შორის ყველაზე მაღალი რეიტინგი აქვს — რესპონდენტთა მხოლოდ 3%-მა მისცა მას უარყოფითი შეფასება.

მონაცემები აჩვენებს, რომ რეგიონში ლიდერობის აღქმა დიდწილად პერსონალურ თვისებებსა და სოციალურ ზრუნვაზეა დაფუძნებული, ხოლო ინსტიტუციური და დემოკრატიული მახასიათებლები შედარებით ნაკლებ როლს თამაშობს.

"კვლევამ აჩვენა, რომ ყველაზე მნიშვნელოვანი თვისება, რომელიც ლიდერს უნდა ჰქონდეს, არის რიგით ადამიანებზე ზრუნვა (42%). ეს მაჩვენებელი პირველ ადგილზეა ინგუშეთში, ჩეჩნეთსა და შემდეგ ჩრდილოეთ ოსეთში — 47%-დან 50%-მდე. ამას მოჰყვება პრინციპულობა და პატიოსნება (27%) და ძლიერი ხასიათი (15%). სხვა მახასიათებლებმა მნიშვნელოვნად ნაკლები წილი დააგროვეს" — ვკითხულობთ კვლევაში.