შალვა პაპუაშვილმა დღეს გამართულ ბრიფინგზე განაცხადა, რომ ცოტა დაიგვიანა აშშ-სთან ურთიერთობის აღდგენამ, "მოლოდინი იყო, რომ ამ ყველა გარემოების გათვალისწინებით, ახალი ადმინისტრაციის ჩამოყალიბებისთანავე იქნებოდა გარკვეული ნაბიჯები გადადგმული, თუმცა ისიც ვნახეთ, რომ ამასობაში სხვადასხვა კრიზისები განვითარდა. სჯობს გვიან ვიდრე არასდროს".

მისივე თქმით, აპრილში ელოდებიან, რომ "იქნება შემდეგი ნაბიჯები ურთიერთობების გადატვირთვისკენ მიმართული".

"ის, რომ შედგა საუბარი სახელმწიფო მდივანსა და საქართველოს პრემიერმინისტრს შორის, ეს სწორედ არის იმის მანიშნებელი, რომ ქვეყნებს და ხელისუფლებებს შორის ურთიერთობა მაღალ პოლიტიკურ დონეზე ავიდა. ჩვენ გვაქვს მოლოდინი, რომ ახლა უკვე მოიძებნოს კონკრეტული გადაწყვეტა, თუ როგორი უნდა იყოს პარტნიორობა ამერიკასა და საქართველოს შორის. ასე რომ, აპრილში ველოდებით იმას, რომ მათ შორის, ამ საუბრის შედეგად, იქნება შემდეგი ნაბიჯები ურთიერთობების გადატვირთვისკენ მიმართული", — განაცხადა შალვა პაპუაშვილმა ბრიფინგზე ჟურნალისტებთან საუბრისას.

ჟურნალისტის კითხვაზე, აღდგება თუ არა უახლოეს მომავალში სტრატეგიული პარტნიორობა აშშ-სთან, პაპუაშვილი პასუხობს:

"მიზანი არის არა სტრატეგიული პარტნიორობის აღდგენა, არამედ მიზანი არის საქართველოსა და აშშ-ს შორის პარტნიორობის არსებობა, რომელიც იქნება დამყარებული ურთიერთ ინტერესებზე. სტრატეგიული პარტნიორობა არის ინდიკატორი, რომელიც ნათლად გვაჩვენებს, რომ ამ მიზანს ვაღწევთ. რა თქმა უნდა, სტრატეგიული პარტნიორობა, როგორც ფორმალური ჩარჩო ურთიერთობისა, ეპითეტისთვის არ გვჭირდება. მანამდე, აშშ-სა და საქართველოს შორის სტრატეგიული პარტნიორობა, გარკვეულწილად, ეპითეტის დონეზე იყო, ვინაიდან ის შინაარსით დიდად დატვირთული არ იყო. სტრატეგიულ პარტნიორობას ხელი 2009 წელს მოეწერა, აგვისტოს ომის შემდეგ რამდენიმე თვეში. ეს იყო გარკვეული "დამამშვიდებელი პრიზი" მიხეილ სააკაშვილისთვის წაგებული ომის შემდეგ, რომ სამაგიეროდ, სტრატეგიული პარტნიორობა გვაქვს აშშ-სთან, თუმცა ის შინაარსით არასდროს შევსებულა, ისე როგორც ეს უნდა ყოფილიყო.

ახლა ჩვენ, რაც გვინდა, არის ახალი სტრატეგიული პარტნიორობა. ჩვენი შეთავაზებაა, რომ ეს იყოს შინაარსით გაჯერებული ჩარჩო, სადაც ორივე ერების ინტერესებზე დაყრდნობით იქნება შეთანხმებული კონკრეტულად, რა მოლოდინები გვაქვს ამ პარტნიორობისგან და რა მიზნები აქვს ამ პარტნიორობას. ჩვენ ვართ ამ დიალოგისთვის გახსნილი. ის, რომ სახელმწიფო მდივანსა და პრემიერმინისტრს შორის საუბარი შედგა აჩვენებს, რომ აშშ-ს ახალი ადმინისტრაციაც მოწადინებულია აქეთკენ. ასე რომ, ჩვენ ეს გვაძლევს გარკვეული ოპტიმიზმის საშუალებას. რა თქმა უნდა, ცოტა დაიგვიანა ამ ყველაფერმა, მოლოდინი იყო, რომ ამ ყველა გარემოების გათვალისწინებით, ახალი ადმინისტრაციის ჩამოყალიბებისთანავე იქნებოდა გარკვეული ნაბიჯები გადადგმული, თუმცა ისიც ვნახეთ, რომ ამასობაში სხვადასხვა კრიზისები განვითარდა. სჯობს გვიან ვიდრე არასდროს. ეს დამოკიდებულია აშშ-ის ახალ ადმინისტრაციაზე. ჩვენი მხრიდან, ერთ წელზე მეტია, რაც მზაობა გაცხადებული გვაქვს", - განაცხადა პაპუაშვილმა.