რამზან კადიროვმა მემკვიდრე შეცვალა — ახმატ კადიროვმა თავისი უმცროსი ძმის, ადამ კადიროვის ადგილი დაიკავა. მემკვიდრეობის რიგითობის ცვლილების შესახებ ინფორმაცია ფედერალური უსაფრთხოების სამსახურის (FSB) წყაროზე დაყრდნობით რუსულმა მედიასაშუალებამ, Novaya Gazeta Europe-მ გაავრცელა.

როგორც OC-MEDIA წერს, ადამ კადიროვმა მამის კეთილგანწყობა ავტოსაგზაო შემთხვევით გამოწვეული ინციდენტის შემდეგ დაკარგა. FSB-ს წყარო ამტკიცებს, რომ რამზან კადიროვი თავიდან "ძალიან ნერვიულობდა" შვილის გამო, მაგრამ მას შემდეგ რაც შეიტყო, რომ მისი მდგომარეობა დასტაბილურდა, "ბრაზი გადმოანთხია" და მემკვიდრის არაფორმალური სტატუსი ჩამოართვა. წყაროს თანახმად, ადამ კადიროვი "სათადარიგოთა სკამზე" იმის გამო დასვეს, რომ მან მამა "რთულ პოლიტიკურ მომენტში ძალიან იმედგაცრუებული დატოვა". "დუსტუმს [ადამ კადიროვის მეტსახელი] აშკარად დაუქვეითდა სტატუსი, თუმცა გაურკვეველია, რამდენ ხანს იქნება ის სათადარიგოთა სკამზე", — განაცხადა კადიროვის გარემოცვის წყარომ.

"ბოსი ძალიან შეშინებული იყო და შვილის სახელით მოსკოვში გავლენიან ფიგურებს უნდა დაჰკავშირებოდა. როდესაც ნათელი გახდა, რომ ყველაფერი მეტ-ნაკლებად რიგზე იყო, მან ბრაზი გარეთ გამოუშვა. დუსტუმმა თავისი სულელური საქციელით, მას სერიოზული კომპრომეტირება გაუკეთა, თანაც ასეთ რთულ პოლიტიკურ მომენტში. ყოველ შემთხვევაში, როგორც ჩანს, ადამზე ამას დიდად არ უმოქმედია. ის უფრო იმის გამოა ნაწყენი, რომ ექიმებმა კომპიუტერული თამაშები აუკრძალეს. მას არ აინტერესებს ჩეჩნეთი ან პოლიტიკა, მაგრამ ცხოვრება PUBG-ის გარეშე ვერ წარმოუდგენია", — იტყობინება Novaya Gazeta Europe.

რამზან და ახმატ კადიროვები

რამზან და ახმატ კადიროვები

ფოტო: kaktus.media

ჟურნალისტების თქმით, ახმატ კადიროვი ბოლო კვირების განმავლობაში რეგულარულად ახლავს მამას ოფიციალურ ღონისძიებებზე, ესწრება შეხვედრებს ძალოვანი უწყებების წარმომადგენლებთან და მონაწილეობს რელიგიურ შეკრებებში, მათ შორის პარასკევის ლოცვაზე, სადაც ის ჩეჩნეთის ლიდერისა და მისი ახლო გარემოცვის გვერდით პირველ რიგში ჩანს.

ამავდროულად, ადამ კადიროვმა, რომელიც ადრე ხშირად ჩნდებოდა მამის გვერდით, ბოლო დროს ნაკლებად თვალსაჩინო როლი დაიკავა. რელიგიურ ღონისძიებებზე ის უფრო უკანა რიგებშია, ხოლო ჩეჩნეთის სახელმწიფო მედიის ოფიციალურ რეპორტაჟებში ის უფრო იშვიათად ჩნდება.

ცნობისთვის, ადამ კადიროვი ავტოავარიაში 16 იანვარს მოყვა. გავრცელებული ინფორმაციით, კადიროვის ავტომობილი სხვა მანქანას შეეჯახა, რომლის მძღოლიც დაიღუპა. ადამ კადიროვი და მისი გარემოცვის დაახლოებით 20 წევრი ჰოსპიტალიზებული იქნა. მოგვიანებით ის სამკურნალოდ მოსკოვში გადააფრინეს.

რამზან კადიროვმა ავარიის შესახებ ცნობებზე საჯარო კომენტარი მხოლოდ 9 თებერვალს გააკეთა და მათ "შემოგდებული ამბავი" უწოდა. მეორე დღეს გამოაქვეყნა შვილის ვიდეო, რაც ინციდენტის შემდეგ მისი პირველი საჯარო გამოჩენა იყო.