2026 წლის ევროვიზიის სიმღერის კონკურსის დაწყებამდე თვეზე სულ ცოტათი მეტი გვაშორებს. სანამ ავსტრიის დედაქალაქ ვენაში საიუბილეო, რიგით 70-ე ევროფესტივალი სტარტს აიღებს, წლევანდელ მონაწილეებს მკაცრად გაწერილი რეჟიმით ცხოვრება უწევთ: რეპეტიციები, ინტერვიუები, კონცერტები წინასაკონკურსო კამპანიის ფარგლებში...

ამასობაში კი, ცნობილი გახდა, რომელი ქვეყანა მერამდენე ნომრად წარდგება ნახევარფინალურ ტურებში. კონკურსანტების გამოსვლის რიგითობას თავად შოუს პროდიუსერები წყვეტენ. და, როგორც 2 აპრილს შევიტყვეთ, საქართველოს წარმომადგენელი ჯგუფი ბზიკები პირველ ნახევარფინალში მე-6 ნომრად გამოვა. ეს ფაქტი კი საინტერესო დამთხვევაა, თუ გავიხსენებთ, რომ...

18 წლის წინ, 2008 წლის საბავშვო ევროვიზიის სიმღერის კონკურსზე, ჯგუფი ბზიკები სწორედ მე-6 ნომრად წარდგა სცენაზე. მეტსაც გეტყვით, საბავშვო ევროფესტივალზე იმ წელს 15 ქვეყანა მონაწილეობდა, წლევანდელი ევროვიზიის პირველ ნახევარფინალს კი ასევე 15 მონაწილე ჰყავს. იმის შეხსენება ალბათ არაა საჭირო, როგორ დასრულდა 2008 წლის ევროვიზია ჯუნიორი ჩვენთვის.

გამეორდება თუ არა ისტორია 18 წლის შემდეგ, ამას სულ მალე შევიტყობთ. ევროვიზიის პირველი ნახევარფინალი 12 მაისს, თბილისის დროით 23 საათზე დაიწყება. ტურის საუკეთესო შედეგის მქონე 10 მონაწილე ფინალის საგზურს გაინაღდებს. ევროფესტივალის გრანდიოზული ფინალი კი 16 მაისს გაიმართება.

საინტერესოა ისიც, რომ ბოლო წლებისგან განსხვავებით, ნახევარფინალურ ტურებში მონაწილეებს ტელემაყურებელთან ერთად ჟიურიც შეაფასებს.

რაც შეეხება პროგნოზებს: ბუქმეიკერების რეიტინგში ყველაფერი მას შემდეგ იცვლება ხოლმე, რაც კონკურსის მონაწილეები მასპინძელ ქვეყანაში ჩადიან და ოფიციალურ რეპეტიციებს იწყებენ. თუმცა, ამ დროისთვის, შეკითხვაზე თუ ვინ მოიგებს პირველ ნახევარფინალს (და არა ვინ გადავა ფინალში) საქართველო ბუქმეიკერების გათვლებით მერვე პოზიციას იკავებს, რაც დამაიმედებელი პროგნოზი ჩანს.

ბზიკები — მარიამ კიკუაშვილი, გიორგი შიოლაშვილი და მარიამ თათულაშვილი — წლევანდელ ევროვიზიაზე გიგა კუხიანიძის სიმღერით On Replay წარდგებიან. კუხიანიძის დაწერილია ოთხივე სიმღერა, რომლებითაც საქართველომ სხვადასხვა წელს საბავშვო ევროვიზია მოიგო, მათ შორის, თავად ბზიკების 2008 წლის გამარჯვებული სიმღერა ბზზზ.

ასევე იხილეთ:

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...