უკრაინის საგარეო საქმეთა მინისტრი დმიტრო კულება მადლობას უხდის კომპანია Shell-ს რუსული ნედლი ნავთობის შესყიდვის შეწყვეტისთვის. მისი თქმით, ეს ნაბიჯი წაახალისებს სხვა მსოფლიო ბიზნესებსაც.

"მადლობა Shell-ს ამ მორალური და პასუხისმგებლიანი ნაბიჯისთვის და სხვა მსოფლიო ბიზნესების წახალისებისთვის", — წერს ის.

კომპანია Shell რუსული ნედლი ნავთობის შესყიდვას დაუყოვნებლივ წყვეტს. Bloomberg-ის ცნობით, Shell Plc ეტაპობრივად რუსული გაზისა და ნავთობის ყველა ტიპის შესყიდვას შეწყვეტს.

მათივე ცნობით, რუსეთის მხრიდან უკრაინაში შეჭრის ფაქტმა უზარმაზარი კომპანიები აიძულა, რუსეთიდან გასულიყვნენ. მათ შორის, საუბარია ენერგეტიკულ გიგანტებზე — BP Plc და Exxon Mobil Corp.

ამ გადაწყვეტილებამდე, 5 მარტს კულებამ მულტინაციონალურ კომპანიებს — მათ შორის Shell-ს — რუსეთთან კავშირების გაწყვეტისკენ მოუწოდა.

"მითხრეს, რომ გუშინ Shell-მა რუსული ნავთობი ფარულად იყიდა. ერთი შეკითხვა მაქვს Shell-თან: თქვენთვის რუსულ ნავთობს უკრაინული სისხლის სუნი არ ასდის? მოვუწოდებ ყველა კეთისლისნდისიერ ადამიანს მთელს მსოფლიოში, მულტინაციონალურ კომპანიებს რუსეთთან საქმიანი კავშრების შეწყვეტა მოსთხოვონ", — დაწერა კულებამ.

აღსანიშნავია, რომ აშშ-ში რუსული ნავთობის იმპორტის აკრძალვაზე ღიად საუბრობენ. აშშ-ის სახელმწიფო მდივნის, ენტონი ბლინკენის განცხადებით, ამერიკის შეერთებული შტატები და ევროპელი მოკავშირეები რუსული ნავთობის იმპორტზე ემბარგოს დაწესებას განიხილავენ.

Bloomberg წერს, რომ ევროპის ქვეყნები, რომლებიც რუსულ ენერგორესურსებზე უფრო მეტად არიან დამოკიდებულნი, ჯერჯერობით თავს არიდებენ რუსულ ნავთობზე აკრძალვის დაწესებას, თუმცა კომპანიებზე, რომლებიც რუსული ენერგიის ექსპორტს ახორციელებენ, ზეწოლა იზრდება.

აღსანიშნავია, რომ გუშინ ბარელი ნავთობის ღირებულება 140 დოლარს მიუახლოვდა. Brent ტიპის ნავთობის ფასი ამჟამად ბარელზე დაახლოებით 127 დოლარია.