ბაზრის ექსპერტები და აქციებით ვაჭრობაში გამოცდილი ადამიანები გვირჩევენ, რომ ინვესტირებას გრძელვადიან პერსპექტივაში შევხედოთ. სწორედ ამიტომ, კომპანიების შესახებ კვლევის ჩატარებისას განსაკუთრებული ყურადღება იმას უნდა მიაქციო, რამდენად შეუძლია ფირმას წლების განმავლობაში განვითარდეს.

შესაძლებელია, საინვესტიციო გზაზე კრიზისები ხშირად შეგხვდეს. ეს ამ საქმის განუყოფელი ნაწილია, თუმცა როდესაც კომპანიას მკაფიო სტრატეგია აქვს და პერსპექტიულ სექტორში ოპერირებს, მისთვის ყველა კრიზისი შედარებით მარტივად დაძლევადია.

ამ სტატიაში Shopify-სა და The Trade Desk-ის შესახებ გიყვებით — კომპანიებზე, რომლებიც ტექ-სექტორს მიეკუთვნებიან და ბიზნეს ციკლის ჯერ კიდევ მზარდ კატეგორიაში გადიან. ბაზრის ექსპერტები ამ აქციების ყიდვას და მომავალი ათი წლის განმავლობაში შენახვას გვირჩენ. თუ რატომ, ამას სტატიის მომდევნო ნაწილში მოგიყვებით.

The Trade Desk

The Trade Desk ერთგვარი პლატფორმაა, სადაც მარკეტერები ქმნიან და მართავენ ციფრულ სარეკლამო კამპანიებს. ბოლო წლების განმავლობაში ინტერნეტში სარეკლამო ხარჯები იზრდება, რაც ამ კომპანიის წისქვილზეც ასხამს წყალს.

2014-დან 2021 წლამდე The Trade Desk-მა საკუთარი შემოსავლები $45 მილიონიდან $1,2 მილიარდამდე გაზარდა. შემოსავლების ამგვარი ზრდა ცხადად აჩვენებს, რომ ციფრულ სამყაროში რეკლამირება მარკეტერებისთვი საკმაოდ მომგებიანია. ამის ერთ-ერთი მიზეზი ისიც არის, რომ ინტერნეტში რეკლამის განთავსების შემთხვევაში ბიზნესს საშუალება აქვს, ინვესტირების ამონაგები მარტივად გაზომოს.

აღსანიშნავია, რომ 2021 წელს რეკლამების 64,4% ციფრულ არხებზე გადავიდა — ეს მონაცემი 2019 წლისთვის 52,1% იყო. თუ დინამიკას შევხედავთ, ვნახავთ, რომ ინტერნეტ-რეკლამას ზრდის დიდი პოტენციალი აქვს. სწორედ ეს აძლევს ანალიტიკოსებს იმის თქმის საფუძველს, რომ The Trade Desk სამომავლოდ გაიზრდება.

აქვე უნდა ითქვას ისიც, რომ The Trade Desk-მა 2021 წელს $1,2 მილიარდიანი შემოსავლიდან 138 მილიონი დოლარის მოგება მიიღო. სავარაუდოა, რომ შემოსავლების ზრდის ამგვარი ტემპის შენარჩუნების შემთხვევაში, კომპანიის მოგება გაიზრდება, რადგან ფირმის ბიზნეს-მოდელში, ძირითადად, ფიქსირებული ხარჯებია გათვალისიწინებული.

Shopify

Shopify ელექტრონული კომერციის პლატფორმაა, რომელიც ონლაინ მაღაზიებსა და საცალო სავაჭრო წერტილებს აერთიანებს. ეს კომპანია იმ ფირმებს შორის არის, რომლებმაც პანდემიის პერიოდში დიდი მოგება ნახეს. თუ ბოლო წლების სტატისტიკას გადავხედავთ, ვნახავთ, რომ Shopify-მ 2012-2021 წლებში საკუთარი შემოსავალი $24 მილიონიდან $4,6 მილიარდამდე გაზარდა.

არავისთვის არის საიდუმლო, რომ მომხმარებლები ინტერნეტში უფრო და უფრო მეტს ხარჯავენ. ეს მარტივად ახსნადია, რადგან ონლაინ ვაჭრობა ადამიანებს უფრო მეტ კომფორტს უქმნის.

Shopify საკუთარ მომსახურებას თვეში 29 დოლარიდან გვთავაზობს და მსხვილი ბიზნესისთვის ტარიფები 2 000 დოლარამდე იზრდება.ს

2021 წელს $4,6-მილიარდიანი შემოსავლით Shopify-მ ბაზრის მნიშვნელოვანი წილი დაიკავა. თუმცა, უნდა ითქვას, რომ მას განვითარების დიდი პოტენციალი აქვს. უფრო მეტიც, სავარაუდოა, რომ ამ ბაზრის ზომა გაფართოვდება, რაც, მათ შორის, Shopify-ს მეტ გასაქანს მისცემს.

თუ საინვესტიციო საქმიანობას გრძელვადიანი პერსპექტივით უყურებ, ისეთი კომპანიები მოძებნე, რომლებსაც განვითარების დიდი დიაპაზონი აქვთ. ამასთან, უნდა ითქვას, რომ ამ საქმის სპეციალისტები აქციებში ფულის დაბანდებამდე სიღრმისეული კვლევის ჩატარების რეკომენდაციას გასცემენ.

ვაჭრობა/ინვესტირება დაკავშირებულია მაღალ რისკებთან და იმ შემთხვევაშიც კი, თუ რეკომენდაციების შესაბამისად არის განხორციელებული, შესაძლოა გამოიწვიოს არსებითი დანაკარგები, ისევე, როგორც მოგება. თქვენ დეტალურად უნდა გააანალიზოთ, რამდენად მისაღებია თქვენთვის ვაჭრობა/ინვესტირება თქვენი ფინანსური მდგომარეობის გათვალისწინებით და შეგიძლიათ თუ არა გასწიოთ თანხის დაკარგვის რისკი.

აქციებით ვაჭრობა ახლა უკვე საქართველოს ბანკის მობილბანკით არის შესაძლებელი. ესტუმრე მობილბანკს, რომლის საშუალებითაც ისეთი საერთაშორისო კომპანიების ფასიანი ქაღალდებით ვაჭრობას შეძლებ, როგორებიცაა: Apple, Amazon, Microsoft, Tesla, Google და სხვა. ეს სიახლე საქართველოს ბანკმა მისი ჯგუფის შვილობილი კომპანიის, Galt & Taggart-ისა და საერთაშორისო ფინანსური ტექნოლოგიების პლატფორმა DriveWealth-ის პარტნიორობით დანერგა. თუ გსურს მეტი გაიგო ინვესტიციების შესახებ, ესტუმრე ფეისბუქგვერდს — ინვესტიციები, სადაც გაიგებ მეტს, თუ როგორ ივაჭრო აქციებით.