ქართული ოცნების აღმასრულებელი მდივანი მამუკა მდინარაძე აცხადებს, რომ ამდენი ხანი არავის გახსენებია "თაროზე შემოდებული რაღაც წერილი" და ახლა "გადმოიღო ვიღაცამ", ეს კი მთავარ არხს, TV პირველს და ნაციონალურ მოძრაობას "კარგად გამოადგათ. მდინარაძის თქმით, რატომღაც ახლა გამოგზავნეს წერილი და ამით "ყველაფერი ნათელია".

"2020 წელს გაგზავნილი წერილის პასუხი, ორი დღის წინ, ამ სიტუაციაში რომ მოდის, ალბათ აქ ყველაფერი გასაგებია. არავის გახსენებია ამდენი ხანი თაროზე შემოდებული რაღაც წერილი, ახლა გადმოიღო ვიღაცამ, შესაბამისმა უწყებამ რუსეთიდან და გამოაგზავნა წერილი, შემდეგ კარგად გამოადგათ ეს ამბავი მთავარ არხს, ტვ პირველს, ნაცმოძრაობას და ასე შემდეგ. შიგნით წარმოებული ამ ისტერიული კამპანიის პარალელურად, ერთი მხრივ გავრილოვის ინტერვიუები, გახსოვთ ხომ, ეს არხები წერდნენ გავრილოვს 5 წუთში, როცა დასჭირდებოდათ. რაც არ უნდა გასაკვირი იყოს, გავრილოვს წერდნენ 5 წუთში. გუშინაც რატომღაც 450 დეპუტატიდან მაინდამაინც გავრილოვმა გამოიჩინა თავი და განცხადებები აკეთა, ახლაც რატომღაც წერილი მოვიდა, რომ კიბატონო რა კარგი ყოფილა თქვენი რძის პროდუქტებიო, გაახსენდათ ორწელიწადნახევრის თუ ორი წლის თავზე. აქ მგონი ყველაფერი ნათელია", — ამბობს მდინარაძე.

რუსეთის ვეტერინარული და ფიტოსანიტარული კონტროლის ფედერალურმა სამსახურმა, რომელიც მოქმედებს როგორც სადამსჯელო ორგანო რუსეთის ფედერაციის არამეგობრული სახელმწიფოების მიმართ სავაჭრო სანქციების დაწესებისთვის, 15 ქართულ საწარმოს შესაძლოა რუსეთში რძის პროდუქტების გატანის ნებართვა მისცეს.

Tass-ის ცნობით, როგორც დეპარტამენტში განმარტავენ, ეს გადაწყვეტილება მის ხელმძღვანელ სერგეი დანკვერტს, საქართველოს სოფლის მეურნეობის სამინისტროს სურსათის ეროვნული სააგენტოს ხელმძღვანელს, ზურაბ ჩეკურაშვილსა და სურსათის უვნებლობის თავმჯდომარეს შორის 5 მარტის მოლაპარაკების შედეგად მიიღეს.

საქართველოს სურსათის ეროვნულმა სააგენტომ განაცხადა, რომ რუსეთთან მოლაპარაკებები 2020 წლიდან მიმდინარეობდა და ქართული პროდუქტის ექსპორტზე გატანის გადაწყვეტილებაც სწორედ ამის საფუძველზე იქნა მიღებული.

ეკონომიკის მინისტრის, ლევან დავითაშვილის განცხადებით კი, რუსეთის მხრიდან საქართველოსთვის რძის პროდუქტების ექსპორტის შეთავაზებაზე შექმნილი აჟიოტაჟი ინფორმაციის ნაკლებობის გამოა. მისი თქმით, რუსეთში პროდუქტების ექსპორტის განაცხადი 2020 წელს კერძო კომპანიებმა გაგზავნეს და მას შემდეგ არანაირი მოლაპარაკებები მხარეებს შორის არ შემდგარა.