სახალხო დამცველი, ნინო ლომჯარია მთავრობას მოუწოდებს, რომ უკრაინას ვითარების გამოსწორებამდე მზურველობამოკლებული ბავშვების საქართველოში გადმოყვანა შესთავაზოს.

"სახალხო დამცველი მოუწოდებს სახელმწიფოს, გადადგას ქმედითი ნაბიჯები, მათ შორის, შესთავაზოს უკრაინის მთავრობას მზრუნველობამოკლებული ბავშვების საქართველოს ტერიტორიაზე გადმოყვანა და დროებით ზრუნვის ფორმაში განთავსება, მათი საუკეთესო ინტერესების გათვალისწინებით, სანამ მათ სამშობლოში უსაფრთხო გარემო არ შეიქმნება", — ნათქვამია განცხადებაში.

განცხადებაში აღნიშნულია, რომ საომარი მოქმედებების გამო უკრაინაში ათეულობით ბავშვი დაიღუპა, დაშავდა, ან მშობლის, მზრუნველი პირისა და საცხოვრისის გარეშე დარჩა. განსაკუთრებით რთული კი იმ ბავშვების მდგომარეობაა, ვინც სახელმწიფო ზრუნვაში იმყოფება.

"საომარი ვითარებისას ყველაზე მეტად, სწორედ, ბავშვებს, მათ სიცოცხლესა და კეთილდღეობას ემუქრება საფრთხე. შესაბამისად, სახალხო დამცველი, როგორც საერთაშორისო, ასევე ეროვნულ დონეზე, უფლებამოსილების ფარგლებში, მიმართავს ყველა მექანიზმს, რათა უზრუნველყოფილ იქნეს მათი მაქსიმალური დაცვა ნებისმიერი ზიანისგან. ასევე, სახალხო დამცველი უერთდება ევროპის ბავშვთა ომბუდსმენების ქსელის მოწოდებას უკრაინაში მიმდინარე ომის პირობებში მყოფ ბავშვთა უფლებების მყისიერი დაცვისკენ", — აღნიშნულია განცხადებაში.

ამასთან, სახალხო დამცველი და მისი გუნდი პროცესში ჩართვის მზაობას გამოთქვამს, როგორც დროებითი მიმღები ოჯახების მოძიების, შეფასებისა და მონიტორინგის, ასევე, მრავალმხრივი მოხალისეობრივი საქმიანობის კუთხით.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში