სახალხო დამცველის, ნინო ლომჯარიას განცხადებით, ევროკავშირის წევრობის კანდიდატის სტატუსის მოთხოვნა არა პოლარიზაციის, არამედ ქვეყნის გაერთიანების მიზეზად უნდა იქცეს.

"აღნიშნული იდეა უნდა ვაქციოთ ქვეყნის გაერთიანების და არა კიდევ უფრო დახლეჩვის ან პოლარიზაციის მიზეზად! უნდა გამოვიჩინოთ პოლიტიკური სიმწიფე და არ ავყვეთ დესტრუქციას, ვისგანაც არ უნდა მოდიოდეს ის!" — წერს ის.

მისივე თქმით, ახლა მნიშვნელოვანია, რომ პოლიტიკურმა სპექტრმა დასავლეთს ამ იდეის გარშემო ერთსულოვნება აჩვენოს. სახალხო დამცველი აღნიშნავს, რომ ოპოზიციურმა პარტიებმა ევროპის პარლამენტში პარტნიორ პარტიებს უნდა გაუგზავნოს მესიჯი, რომ ამ იდეის გარშემო ყველა გაერთიანებულები ვართ.

ამასთან, ლომჯარია ამბობს, რომ ხალხის პროტესტმა განცხადების გაგზავნაში გადამწყვეტი როლი შეასრულა, რადგან "ყველა ხელისუფლებას უფრო მეტად ეშინია საკუთარი ამომრჩევლის, ვიდრე გარე ძალების".

"ახლა გამოჩნდებიან სკეპტიკოსებიც მათ რიგებშიც, გაგვიხსენებენ ჩავარდნილ რეფორმებს, დემოკრატიის უკუსვლას, ყველა შეურაცხმყოფელ განცხადებას, რაც მათი მისამართით ბოლო პერიოდში ხელისუფლების წარმომადგენლებს გაუკეთებიათ, თუმცა ჩვენ მათ უნდა შევახსენოთ, რომ რუსეთთან კონფლიქტების შედეგად ჩვენი გმირი ჯარისკაცების და მშვიდობიანი მოსახლეობის სისხლი 30 წლის განმავლობაში სწორედ საქართველოს დემოკრატიულ და ცივილიზებული სამყაროს წევრობის მისწრაფების გამო იღვრებოდა!", — დასძენს ის.

დღეს, 3 მარტს პრემიერმინისტრმა, ირაკლი ღარიბაშვილმა ევროკავშირში გაწევრიანების მოთხოვნის დოკუმენტს ხელი მოაწერა.

ქართული ოცნების თავმჯდომარემ, ირაკლი კობახიძემ 2 თებერვალს განაცხადა, რომ საქართველო ევროკავშირის წევრობის კანდიდატის სტატუსის მისაღებად განაცხადს ხელს მოაწერდა.