ლონდონის საფონდო ბირჟაზე Sberbank-ის აქციების ფასი დღეს 1 ცენტამდე დაეცა. ამჟამად კომპანიის ერთი აქცია 2 ცენტად ივაჭრება. ბოლო ერთ დღეში Sberbank-ის აქციების ღირებულება 90%-ით არის შემცირებული — გუშინდელი სავაჭრო დღე კომპანიის აქციებისთვის 21-ცენტიან ნიშნულზე დაიხურა.

Guardian-ის ინფორმაციით, Sberbank-ი ევროპის ბაზარს ტოვებს. ბანკის განცხადებით, ევროპის ფილიალებს ფულადი სახსრების გადინება უფიქსირდებათ, რის შესავსებადაც ის ფილიალებს ფულს ვერ აწვდის. ბანკი დასძენს, რომ მას აქვს საკმარისი კაპიტალი იმისთვის, რომ ყველა მეანაბრე დააკმაყოფილოს.

Sberbank-ის აქციები არ ივაჭრება მოსკოვის ბირჟაზე, რომელიც ორშაბათის შემდეგ არ გახსნილა.

ასეთია სხვა მსხვილი რუსული კომპანიების აქციების მდგომარეობა ლონდონის საფონდო ბირჟაზე:

  • Lukoil — გაუფასურდა 97%-ით და ერთი აქცია 32 ცენტი ღირს.
  • Rosneft — გაუფასურდა 64%-ით და ერთი აქცია 98 ცენტი ღირს.
  • Gazprom — გაუფასურდა 9%-ით და ერთი აქცია 14,56 დოლარი ღირს.
  • PhosAgro — გაუფასურდა 98%-ით და ერთი აქცია 5 ცენტი ღირს.

რუსული კომპანიების აქციების ვარდნა თავისუფალი სამყაროს მხრიდან აგრესორ ქვეყანაზე დაწესებული სანქციების შედეგია. ბოლო ინფორმაციით, ევროკავშირმა SWIFT-დან ძირითადი რუსული ფინანსური ინსტიტუტები გათიშა, მათ შორისაა — Bank Otkritie, Novikombank, Promsvyazbank, Bank Rossiya, Sovcombank, Vnesheconombank (VEB), VTB Bank.

გაიგეთ მეტი: