დიდი ხანია მზესუმზირას უკრაინელებისთვის განსაკუთრებული მნიშვნელობა აქვს, რადგან მცენარე ქვეყნის ეროვნული ყვავილია. მას შემდეგ კი, რაც რუსეთი უკრაინაში შეიჭრა, მზესუმზირა ერთიანობისა და იმედის გლობალურ სიმბოლოდ იქცა.

ბოლო დღეებში სოციალური ქსელების მომხმარებლები მზესუმზირას სიმბოლოს უფრო ხშირად იყენებენ. რაც შეეხება სოლიდარობის აქციებს, მცენარეს აქაც ხშირად შეხვდებით.

"ჯიბეში ჩაიდე ეს თესლი, რათა იქ მზესუმზირა გაიზარდოს, როცა მოკვდები", — ასე ეუბნება უკრაინელი ქალი რუს ჯარისკაცს ვიდეოში, რომელიც სოციალურ ქსელებში ვირუსულად გავრცელდა.

მზესუმზირას სიმბოლოთი უკრაინას ცნობილი ადამიანებიც უცხადებენ სოლიდარობას. გასულ ორშაბათს ფოტოგრაფების ყურადღების ცენტრში აშშ-ის პირველ ლედი, ჯილ ბაიდენი, მოექცა, რომელსაც პირბადეზე მზესუმზირას სიმბოლო ჰქონდა გამოსახული.

ფოტო: Getty Images

ხელოვანები მთელი მსოფლიოდან მზესუმზირას ხატავენ, ხოლო ვინც უკრაინაშია ნამყოფი და მისი ულამაზესი ყვითელი მინდვრები უკვე ნანახი აქვს, ამ მოგზაურობებიდან ფოტოებს აზიარებენ.

1996 წელს უკრაინის ოფიციალურმა პირებმა ქალაქ პერვომაისკის სარაკეტო ბაზაზე ქვეყნიდან ბირთვული იარაღის გატანის აღსანიშნავად მზესუმზირები დარგეს. სწორედ ამ დღეს აღნიშნეს უკრაინიდან მსოფლიოში სიდიდით მესამე ბირთვული არსენალის გატანა, რომელიც ქვეყანამ 1991 წელს საბჭოთა კავშირის დაშლის დროს მემკვიდრეობით მიიღო.

ფოტო: Getty Image

დიდი ბრიტანეთის მოსახლეობა ფეისბუქის მეშვებით სხვადასხვა გზას ეძებს, რათა უკრაინელ ადამიანებს დაეხმაროს, რომლებიც იძულებულები არიან ქვეყნიდან გაიქცნენ. ამ მიზნით ყვავილების ერთ-ერთი მაღაზიის მეპატრონემ გადაწყვიტა, რომ გაყიდული მზესუმზირებიდან შემოსული თანხა უკრაინელთა დასახმარებლად გადარიცხოს.