ხარკოვის ოლქის, კუპიანსკის მერმა, გენადი მაცეგორამ ქალაქი რუს ოკუპანტებს ჩააბარა. უკრაინსკაია პრავდას ინფორმაციით, ის ოპოზიციური პარტიის წარმომადგენელია.

მერმა რუსულენოვანი ვიდეომიმართვა გაავრცელა, რომელშიც ჩანს, რომ მას წინ ტელეფონი უდევს. სავარაუდოდ, ის ტექსტს კითხულობს.

მაცეგორა ამბობს, რომ 4 დღის წინ, როდესაც რუსეთის შეტევა დაიწყო, პროკურატურამ, სამხედრო მოსამსახურეებმა და ტერიტორიული თავდაცვის განყოფილებამ ქალაქი დატოვა და მხოლოდ ის და პოლიციის თანამშრომლები დარჩნენ. მისი ნაამბობით, როცა რუსული არმია ქალაქს მიადგა და მოლაპარაკებებისთვის შეხვედრა შესთავაზა, დათანხმდა, რომ მსხვერპლი აერიდებინა.

მაცაგორას მტკიცებით, რუსმა სამხედროებმა დაარწმუნეს, რომ "წესრიგის უზრუნველყოფას აპირებენ" და ქალაქის გადაცემის გადაწყვეტილება თავად მიიღო, ამიტომ პასუხისმგებლობაც მასზეა.

"განვიხილეთ სამხედროების ქმედებები, რომლებიც მიზნად ისახავენ ქალაქში შემოსვლას, წესრიგის უზრუნველყოფას, მოსახლეობის დამშვიდებას. მათ დამარწმუნეს, რომ ეს არანაირად არ იმოქმედებს ქალაქის ცხოვრებაზე: იმუშავებს სკოლები, საბავშვო ბაღები, საავადმყოფოები, სასურსათო მაღაზიები, ტრანსპორტი, ქალაქში წესრიგი იქნება", — ამტკიცებს ის.

მერი ხალხს უმტკიცებს, რომ ხვალინდელი დღიდან "ჩვეულებრივად ცხოვრებას" იწყებენ და საავადმყოფო, სკოლა, ბაღები იფუნქციონირებს. თუმცა მისივე თქმით, სამხედროებმა თქვეს, რომ "პროვოკაციებზე შესაბამისი რეაგირება ექნებათ".

"ჩვენი ცხოვრება დამოკიდებულია ჩვენს ქმედებებზე, იმაზე, თუ როგორ წარმოვადგენთ საკუთარ თავს ახლა", — ამბობს ის და მოქალაქეებს ურჩევს, თამამად გამოვიდნენ ბომბსაცავებიდან და სარდაფებიდან, რადგან ჰგონია, რომ სამომავლო სერიოზული დაბომბვების შესახებ მათ წინასწარ აცნობებენ, რომ "მოსახლეობა უბედური შემთხვევებისგან დაიცვან".

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში