უკრაინის პრეზიდენტის განცხადებით, წინასწარი მონაცემებით, რუსეთის შეტევებს 137 ადამიანი ემსხვერპლა, მათ შორის არიან როგორც სამოქალაქო, ისე სამხედრო პირები. ვოლოდიმირ ზელენსკის თქმით, დაჭრილია ასეულობით ადამიანი.

როგორც მან აღნიშნა, გველების კუნძულზე დაიღუპა ყველა სამხედრო პირი, რომლებიც ტერიტორიას იცავდნენ. საუბარია 13 მესაზღვრეზე, რომლებმაც რუსებს დანებებაზე უარი უთხრეს.

"მტერი თავს ესხმის არა მხოლოდ სამხედრო ობიექტებს, როგორც ამბობს, არამედ სამოქალაქოსაც. ისინი კლავენ ხალხს და მშვიდობიან ქალაქებს სამხედრო სამიზნედ აქცევენ. ეს საზიზღრობაა და არასდროს ვაპატიებთ", — განაცხადა მან.

პუტინმა უკრაინაში ომი დაიწყო, რომელსაც თავად სპეციალურ "სამხედრო ოპერაციას" უწოდებს. თავდასხმები ხორციელდება არაერთ ქალაქში და იბომბება დასახლებული პუნქტები, მათ შორის კიევში. უკრაინის პრეზიდენტმა, ვოლოდიმირ ზელენსკიმ სამხედრო მდგომარეობა გამოაცხადა.

24 თებერვლის მთავარი ამბები:

  • რუსულმა ჯარებმა უკრაინას სხვადასხვა ტერიტორიიდან, მათ შორის ბელარუსიდან შეუტიეს, რასაც ლუკაშენკო უარყოფს;
  • რუსებმა კონტროლი აიღეს რამდენიმე აეროდრომსა და აეროპორტზე;
  • რუსებმა ხელში ჩაიგდეს ჩერნობილის ატომური სადგური;
  • ევროკავშირმა, ბრიტანეთმა და აშშ-მ რუსეთს ახალი სანქციები დაუწესეს;
  • უკრაინამ რუსეთთან დიპლომატიური ურთიერთობები გაწყვიტა;
  • ომის გასაპროტესტებლად აქციები მსოფლიოს სხვადასხვა ქალაქში, მათ შორის, მოსკოვში გაიმართა, სადაც ასეულობით ადამიანი დააკავეს;
  • ორივე მხარეს დაიღუპა ათეულობით სამხედრო, ზუსტი რაოდენობა უცნობია;
  • რუსული რუბლი რეკორდულად გაუფასურდა.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში

გაიგეთ მეტი: