"უსაფრთხოდ და ჯანმრთელად, მინიმუმ დილამდე", — ასე პასუხობს უკრაინაში მყოფი ქართველი, ნაკე მენთეშაშვილი On.ge-ის კითხვას, რამდენად უსაფრთხო ადგილას იმყოფება ახლა. მისი თქმით, მეტროში მოწყობილ თავშესაფარშია და ღამის გათევას იქ აპირებს.

კითხვაზე, ჰქონდა თუ არა კომუნიკაცია საქართველოს საელჩოსთან, ის გვპასუხობს:

"დღეს დავუკავშირდი და ერთადერთი, რაც მითხრეს — დაიმალე სადმეო. ჰოდა, მოვადექი თავშესაფარს", — გვეუბნება ნაკე.

მისი თქმით, თუ მოხერხდება, დილით პოლონეთში აპირებს გამგზავრებას. ამასთან, შესაბამისი დახმარების აღმოსაჩენად კვლავ ეცდება საელჩოსთან დაკავშირებას. On.ge-ის კითხვაზე, სურს თუ არა საზოგადოებისთვის რაიმე გზავნილის დატოვება, ნაკე მენთეშაშვილი გვწერს:

"ალბათ იმის, რომ სისულელეა რუსეთის დასჯაზე საუბარი, როცა ამ წუთას ადამიანები იღუპებიან. ვინმეს დასჯა კი არა, გვერდში დგომა სჭირდება ამ ხალხს".

საქართველოს საგარეო საქმეთა სამინისტრო ამბობს, რომ უკრაინაში მიმდინარე მოვლენების პარალელურად, დიპლომატიური დაწესებულებები ადგილზე საგანგებო რეჟიმში აგრძელებენ მუშაობას. ამოქმედებულია ცხელი ხაზი როგორც საგარეო საქმეთა სამინისტროში, ასევე უკრაინაში საქართველოს დიპლომატიურ დაწესებულებებში, რომელზეც მოქალაქეები იღებენ შესაბამის რეკომენდაციებს უსაფრთხოების ზომებთან დაკავშირებით.

საქართველოს საელჩო, კიევი:

  • +380 (63) 376 77 68
  • +380 (44) 590 69 50
  • +380 (93) 544 01 47

გენერალური საკონსულო, ოდესა:

  • + 380 (63) 176 75 55
  • +380 (93) 761 17 17

საგარეო საქმეთა სამინისტრო:

  • +995 (32) 2 94 50 50

საგარეო უკრაინაში მყოფ საქართველოს მოქალაქეებს ურჩევს, თვალ-ყური ადევნონ სიახლეებს და გაითვალისწინონ უკრაინის მთავრობის რეკომენდაციები და გაფრთხილებები — მათ შორის, ადგილზე არსებულ უსაფრთხოების ზომებთან დაკავშირებით.

პუტინმა უკრაინაში ომი დაიწყო, რომელსაც თავად სპეციალურ "სამხედრო ოპერაციას" უწოდებს. უკრაინული მედიისა და სახელმწიფო სტრუქტურების ინფორმაციით, თავდასხმები ხორციელდება არაერთ ქალაქში და იბომბება დასახლებული პუნქტები, მათ შორის კიევში. უკრაინის პრეზიდენტმა, ვოლოდიმირ ზელენსკიმ სამხედრო მდგომარეობა გამოაცხადა და მოუწოდა ხალხს, არ აჰყვნენ პანიკას.

ბოლო ინფორმაციით, რუსეთის თავდასხმის შედეგად 57 უკრაინელი გარდაიცვალა, 169 დაიჭრა. ინფორმაცია უკრაინის ჯანდაცვის მინისტრმა გაავრცელა და განაცხადა, რომ რუსები საავადმყოფოებს ბომბავენ.

გარდა ამისა, CNN ადგილზე მყოფ ჟურნალისტზე დაყრდნობით წერს, რომ რუსულმა საჰაერო-სადესანტო ძალებმა კიევთან ახლოს მდებარე ანტონოვის აეროპორტზე კონტროლი აიღეს.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში

გაიგეთ მეტი: