ევროსაბჭოს პრეზიდენტი შარლ მიშელი და ევროკომისიის პრეზიდენტი ურსულა ფონ დერ ლაიენი რუსეთის უკრაინაში შეჭრაზე საერთო განცხადებას ავრცელებენ. მათი თქმით, მკაცრად გმობენ რუსეთის უპრეცედენტო სამხედრო აგრესიას უკრაინის წინააღმდეგ.

"ჩვენ უმკაცრესად ვგმობთ რუსეთის უპრეცედენტო სამხედრო აგრესიას უკრაინის წინააღმდეგ. თავისი არაპროვოცირებული და გაუმართლებელი სამხედრო ქმედებებით რუსეთი უხეშად არღვევს საერთაშორისო სამართალს და ძირს უთხრის ევროპულ და გლობალურ უსაფრთხოებასა და სტაბილურობას.

მოვუწოდებთ რუსეთს დაუყოვნებლივ შეწყვიტოს საომარი მოქმედებები, გაიყვანოს სამხედროები უკრაინიდან და სრულად პატივი სცეს უკრაინის ტერიტორიულ მთლიანობას, სუვერენიტეტს და დამოუკიდებლობას. ძალის და იძულების ამგვარი გამოყენების ადგილი 21-ე საუკუნეში არ არის", — აცხადებენ ისინი.

მიშელმა ევროსაბჭოს რიგგარეშე სხდომა მოიწვია. ევროკავშირის ლიდერები კი დღეს მოგვიანებით შეიკრიბებიან, რათა განიხილონ სიტუაცია და რუსეთისთვის ახალ შეზღუდვებზე იმსჯელონ. ურსულა ფონ დერ ლაიენი და ევროკომისია სანქციების შემდგომ პაკეტს გამოაქვეყნებენ.

ევროკავშირი მზადაა უკრაინას ჰუმანიტალური, პოლიტიკური და ფინანსური დახმარება გაუწიოს და აცხადებს, რომ მტკიცედ დგას უკრაინისა და მისი ხალხის გვერდით.

პუტინმა უკრაინაში ომი დაიწყო, რომელსაც თავად სპეციალურ "სამხედრო ოპერაციას" უწოდებს და მიზეზად ოკუპირებული დონეცკისა და ლუგანსკის სეპარატისტი ლიდერების "დახმარების თხოვნას" ასახელებს. ის ამტკიცებს, თითქოს ეს "ოპერაცია" არის თავდაცვა მათგან, ვინც "უკრაინა ტყვედ აიყვანა". ტრადიციულ პროპაგანდისტულ მოტივებზე პუტინი იმეორებს, რომ არ აპირებს უკრაინის ოკუპაციას და უკრაინელი ხალხის თვითგამორკვევის უფლებას უჭერს მხარს.

უკრაინის შინაგან საქმეთა მინისტრის მრჩეველის, ანტონ გონჩარენკოს განცხადებით, განხორციელდა სარაკეტო დარტყმები სამხედრო ადმინისტრაციის ცენტრებზე, აეროდრომებზე, სამხედრო საცავებზე, კიევთან, ხარკოვთან, დნეპერთან. მისივე თქმით, ხდება საზღვრის საარტილერიო დაბომბვა.

უკრაინის საგარეო საქმეთა მინისტრი, დმიტრი კულება აცხადებს, რომ რუსეთმა მათ წიანააღმდეგ სრულმასშტაბიანი ომი დაიწყო და მშვიდობიან ქალაქები იბომბება. მისი თქმით, უკრაინა თავს დაიცავს და მსოფლიომ პუტინი ახლავე უნდა შეაჩეროს.

უკრაინის პრეზიდენტმა, ვოლოდიმირ ზელენსკიმ სამხედრო მდგომარეობა გამოაცხადა. მან მოუწოდა ხალხს, არ აყვნენ პანიკას. მისი თქმით, ყველაფრისთვის მზად არიან და ყველას დაამარცხებენ.

ამავე თემაზე:

• მსოფლიო რუსეთს პასუხს აგებინებს — ჯო ბაიდენი
• კანადა გმობს რუსეთის თავდასხმას უკრაინაზე და G7-ის ლიდერების შეხვედრას გეგმავს

გაიგეთ მეტი:

• რუსეთმა ომი დაიწყო, რა ხდება უკრაინაში — განახლებადი