უწყებათაშორისმა საკოორდინაციო საბჭომ გარკვეული შეზღუდვების მოხსნის გადაწყვეტილება მიიღო.

პირველი მარტიდან საქართველოში შემოსვლის წესი იცვლება. იმ 67 ქვეყნის მოქალაქეები, რომელთა შემოსვლაც აქამდე შეზღუდული იყო, საქართველოში შემოსვლას შეძლებენ იმ შემთხვევაში თუ მათ ჩატარებული ექნებათ ვაქცინაცია ან წარმოადგენენ PCR ტესტის პასუხს.

ამასთანავე, საქართველოს მოქალაქეებისთვის, რომლებსაც არ აქვთ ჩატარებული არც ვაქცინაცია და არც ტესტის პასუხი, 8 დღიანი თვითიზოლაციის ვადა შემცირდება 5 დღემდე. ასევე, საქართველოს მოქალაქეს იმ შემთხვევაში თუ მას აქვს PCR ტესტი, ქვეყანაში შემოსვლისას ეხსნება მესამე დღეს PCR-ის გაკეთებისა ვალდებულება.

საბჭოს გადაწყვეტილებით, კვების ობიექტებში დახურულ სივრცეში ერთ მაგიდასთან დაშვებულ პირთა რაოდენობა იზრდება 10-მდე, ღია სივრცეში კი — 15-მდე. ასევე, უქმდება სტუმართა მაქსიმალურ რაოდენობაზე არსებული შეზღუდვა.

პირველი მარტიდან უქმდება საკარანტინე სივრცეები, ე.წ. კოვიდსასტუმროები.

საკოორდინაციო საბჭომ მიიღო გადაწყვეტილება, ობიექტებში გაუქმდეს თერმოსკრინინგის, ჟურნალის წარმოების და დეზობარიერების ქონის ვალდებულება. სასტუმროებს შეეძლებათ, გამოიყენონ ე.წ. ბუფეტი.

4 მარტიდან დასაშვები იქნება კლუბების ფუნქციონირება და შეეძლებათ ფართის 60%-ის გამოყენება.

15 მარტიდან დაშვებული იქნება კონფერენციების, სემინარებისა და ტრენინგების ჩატარება ყოველგვარი შეზღუდვის გარეშე, ასევე მოიხსნება არსებული 70 ადამიანზე დაწესებული შეზღდუვაც.

უწყებათაშორისი საკოორდინაციო საბჭოსთან არსებული ოპერაციული შტაბის უფროსის, გიორგი ღიბრაძის განცხადებით, საბჭო დღეიდან გადადის ორკვირიანი მუშაობის რეჟიმზე.