რუსეთი აცხადებს, რომ უსაფრთხოების გარანტიების საკითხზე გაგზავნილ წინადადებაზე ამერიკის შეერთებული შტატებისგან კონსტრუქციული პასუხი არ მიუღია

რუსული სახელმწიფო მედიის ინფორმაციით, განცხადების გამოქვეყნების შემდეგ რუსეთის საგარეო საქმეთა სამინისტროს ვებგვერდი მიუწვდომელი იყო, ამიტომ TASS-ზე გამოქვეყნდა.

განცხადებაში ნათქვამია, რომ ამერიკული მხარისგან კონსტრუქციული პასუხი იმ საბაზისო ელემენტებზე, რომელიც რუსულმა მხარემ მოამზადა მოლაპარაკებებისთვის უსაფრთხოების გარანტიების შესახებ, არ მიუღიათ.

"საუბარი ეხება ნატოს შემდეგ გაფართოებაზე უარის თქმას, ასევე, ბუქარესტის სამიტის გადაწყვეტილების უკან გაწვევას, უარის თქმას იმაზე, რომ საბჭოთა კავშირის ყოფილი რესპუბლიკების ტერიტორიებზე შეიქმნას ახალი სამხედრო ბაზები. საუბარია იმ რესპუბლიკებზე, რომლებიც ჯერ კიდევ არ არიან ნატოს წევრები და მათი ინფრასტრუქტურა არ უნდა იყოს გამოყენებული სამხედრო მიზნებით. ასევე, აშშ-მ უარი თქვა, რომ დაუბრუნდეს სამხედრო ინფრასტრუქტურა 1997 წლის მდგომარეობას, როცა დაიდო ნატო-რუსეთის მთავარი შეთანხმება", — აცხადებენ ისინი.

აქვე რუსეთი აცხადებს, რომ ამ მდგომარეობებს მათთვის პრინციპული ხასიათი აქვს. მათივე მტკიცებით, აშშ-მ წინადადებების ეს პაკეტი უგულვებელყო და მიზანმიმართულად მისთვის მოსახერხებელი თემები აირჩია, რომელიც ისე "გადაატრიალა", რომ აშშ-ისა და მოკავშირეებისთვის უპირატესობა შეექმნა.

"შეშფოთებას იწვევს აშშ-ისა და ნატოს ზრდადი სამხედრო აქტივობა კონკრეტულად რუსეთის საზღვრებთან, როცა ჩვენი წითელი ხაზები და ინტერესები, რომ რუსეთმა სუვერენული უფლებით უსაფრთხოება დაიცვას უგულვებელყოფილია.

ულტიმატუმის მსგავს მოთხოვნებს, რომ რუსეთმა თავისივე ტერიტორიებიდან გამოიყვანოს ჯარები, თან ახლავს მუქარები სანქციების გაძლიერებაზე. ეს მიუღებელია და სამომავლო რეალური მოლაპარაკების პერსპექტივებს ანადგურებს", — ამბობენ ისინი.

განცხადებაში რუსეთი აღნიშნავს, რომ ვინაიდან ამერიკულმა მხარემ უარი თქვა მყარ საფუძვლიან იურიდიულ გარანტიებზე, ისინი "იძულებული" იქნებიან, რომ რეაგირება ჰქონდეთ, მათ შორის, სამხედრო-ტექნიკური ხასიათის გზებით.

ამავდროულად რუსეთი დაძაბულობის ფონზე იმეორებს პათოსს, რომ უკრაინაში შეჭრა არ იგეგმება.

26 იანვარს ამერიკის შეერთებულმა შტატებმა და NATO-მ კრემლის მოთხოვნებისა და უკრაინის საზღვართან განვითარებული მოვლენების საპასუხოდ რუსეთს წერილობითი დოკუმენტი გაუგზავნეს.

რუსეთი NATO-სა და აშშ-სგან ითხოვდა უარი ეთქვათ გაფართოებაზე, მათ შორის, დაეკონკრეტებინათ უკრაინისა და სხვა ყოფილი საბჭოთა რესპუბლიკების გაწევრიანება NATO-ში. ამავდროულად, მოთხოვნებს შორის იყო, ალიანსის წევრ სახელმწიფოებს უარი ეთქვათ ნებისმიერ სამხედრო ქმედებაზე ყოფილ საბჭოთა რესპუბლიკებში, აღმოსავლეთ ევროპის, ამიერკავკასიისა და ცენტრალური აზიის ქვეყნებში.

წერილობით პასუხს პირველ თებერვლას რუსეთის პრეზიდენტი, ვლადიმერ პუტინი გამოეხმაურა და აღნიშნა, რომ ის მთავარი საკითხები, რომლებიც რუსეთის შეშფოთებას იწვევდა, უგულებელყოფილია.