პანდემიის პერიოდში ონლაინ თამაში Wordle ძალიან პოპულარული გახდა. ახლა კი თამაშმა 80 წლის ქალის სიცოცხლე იხსნა, რომელიც 20 საათის განმავლობაში საკუთარ სახლში მძევლად ჰყავდათ.

80 წლის დენის ჰოლტი ყოფილი პედაგოგია, რომელიც უცნობმა თავდამსხმელმა კაცმა ილინოისში, საკუთარ სახლში, სარდაფში გამოკეტა. ჰოლტს უცნობი კაცი ღამით დაესხა თავს და დანის მუქარით აიძულა, ხმა არ ამოეღო.

თავდამსხმელმა 80 წლის ქალი საკვებისა და მედიკამენტების გარეშე სარდაფში გამოკეტა. "არ მინდოდა, ასე დამესრულებინა სიცოცხლე და ჩემს შვილებს გაეგოთ, რომ მათი დედა მოკლეს", — განაცხადა ჰოლტმა Washington Post-თან ინტერვიუში და დასძინა, რომ მძევლად ყოფნისას ცდილობდა, სიმშვიდე შეენარჩუნებინა და სიცოცხლისთვის ებრძოლა.

ფოტო: The Washington Post

გამომდინარე იქიდან, რომ 80 წლის ქალი Wordle-ს აქტიურად თამაშობდა, ჰოლტის შვილებმა, რომლებიც საკმაოდ შორს ცხოვრობენ, თამაშში დედის პასიურობა შენიშნეს და ეს ფაქტი ძალიან გაუკვირდათ.

როცა შვილებმა ჰოლტთან დაკავშირება სცადეს, მას ტელეფონი გამორთული ჰქონდა, ამიტომ დახმარება მეზობელს სთხოვეს. კართან მისულ მეზობელს არავინ უპასუხა იმის მიუხედავად, რომ ჰოლტის ავტომობილი სახლთან იყო გაჩერებული. მეზობელმა პოლიცია გამოიძახა და როდესაც სახლში შევიდნენ, სარდაფიდან ქალის ყვირილი გაიგონეს.

ასე გადაარჩინეს 80 წლის ქალი თამაშ Wordle-ის მეშვეობით. პოლიციამ სახლში 32 წლის თავდამსხმელი კაციც იპოვა და დააკავა, რომელსაც სავარაუდოდ, მძიმე მენტალური პრობლემები აქვს.