რუსთავის 11 მაცხოვრებელი გარემოს დაბინძურებით მიყენებული მორალური ზიანის ანაზღაურებას ითხოვს. სამოქალაქო მოძრაობა გავიგუდეს ინფორმაციით, მათ გარემოს დაცვისა და სოფლის მეურნეობის სამინისტროს, ასევე გარემოსდაცვითი ზედამხედველობის დეპარტამენტს სასამართლოში უჩივლეს.

მოქალაქეებმა სარჩელი 2022 წლის 31 იანვარ მოამზადეს და თბილისის საქალაქო სასამართლომ უკვე მიიღო წარმოებაში. როგორც იურისტი, ციალა რატიანი ამბობს, ისინი მორალური ზიანის ანაზღაურებისთვის, სიმბოლურ თანხას 3 000 ლარს ითხოვენ.

"ჩვენ ვითხოვთ მორალურ კომპენსაციას, ჩვენ არ ვითხოვთ ბოდიშის მოხდას, ვინაიდან მხოლოდ ბოდიში ნამდვილად არ არის საკმარისი, იმ რეალობისთვის, რა რეალობაშიც რუსთავის მოსახლეობას უწევს ცხოვრება. ეს არის სიმბოლური თანხა 3000 ლარის ოდენობით მორალური კომპენსაციის სახით, რომელიც უნდა დაეკისროს არა მხოლოდ სახელმწიფოს, ჩვენ გვყავს 2 მოპასუხე — ერთი არის გარემოს დაცვისა და სოფლის მეურნეობის სამინისტრო, მეორე კი გარემოსდაცვითი ზედამხედველობის დეპარტამენტი. თანხა უნდა გაიყოს ნახევარზე", — თქვა მან.

მოძრაობა გავიგუდეთ ერთ-ერთი ლიდერის, თინათინ მაღედანიას თქმით, რუსთავში წელიწადში 270 დღე ცუდი ან ძალიან ცუდი ჰაერია, სახელმწიფო კი მდგომარეობის გამოსასწორებლად ქმედით ნაბიჯებს არ დგამს.

"ეს არის საკმაოდ პრეცედენტული სარჩელი და უკვე წინგადადგმული ნაბიჯი. ძალიან სასიხარულოა ის, რომ წარმოებაში მიიღო სასამართლომ ეს სარჩელი და სხდომაც ჩაინიშნა 2022 წლის 3 მაისს. დიდი იმედი გვაქვს, რომ მოსამართლე დეტალურად მოისმენს ჩვენს წუხილს, იმ რეალურ პრობლემებს, რომლის წინაშეც ჩვენ ყოველდღე ვდგავართ და შესაბამის გადაწყვეტილებას გამოიტანს", — ამბობს ის.

გაიგე მეტი: