რომის პაპი ფრანცისკეს განცხადებით, ომი უკრაინაში "სიგიჟე" იქნება და იმედოვნებს, რომ დაძაბულობა ამ ქვეყანასა და რუსეთს შორის მრავალმხრივი დიალოგის მეშვეობით მოგვარდება. საერთო აუდიენციაზე გამოსვლისას პაპმა მადლობა გადაუხადა მათ, ვინც 26 იანვარს უკრაინაში მშვიდობისთვის ლოცვაში მონაწილეობა მიიღო.

"მოდით, განვაგრძოთ მშვიდობისთვის ლოცვა, რათა დაძაბულობა და ომის საფრთხე სერიოზული დიალოგის გზით მოგვარდეს და ნორმანდიის ფორმატის მოლაპარაკებებმა წვლილი შეიტანოს ამ მიზნის მიღწევაში. ნუ დავივიწყებთ, ომი სიგიჟეა", — თქვა მან.

26 იანვარს რუსეთმა ბელარუსში სამხედრო ძალები განათავსა, რითიც უკრაინის ჩრდილოეთით შეიქმნა ახალი სავარაუდო ფრონტი თავდასხმისთვის. ამის ფონზე რუსეთი ამტკიცებს, რომ უკრაინაში შეჭრას არ გეგმავს, ამავდროულად კი დასავლეთი მკაცრი ეკონომიკური სანქციებით იმუქრება. ბოლო ინფორმაციით, რუსეთს უკრაინის საზღვრებთან 100 ათასამდე სამხედრო ჰყავს მობილიზებული.

3 თებერვალს ამერიკის შეერთებულმა შტატებმა განაცხადა, რომ რუსეთი შეჭრის საბაბად ყალბი ვიდეოს დამზადებას გეგმავდა, სადაც ნაჩვენები იქნებოდა უკრაინელების თავდასხმა რუსეთის ტერიტორიაზე ან რუს სეპარატისტებზე. აშშ-ს ცნობით, ერთ-ერთი ვარიანტი, რომელსაც კრემლი განიხილავს, არის თავდასხმის ინსცენირება და გადაღება, მათ შორის, აფეთქებებისა და მსხვერპლის გამოსახულებები.

ამასთან, როგორც ევროკომისიის ხელმძღვანელმა, ურსულა ფონ დერ ლაიენმა 4 თებერვალს თქვა, თუ რუსეთი უკრაინის მიმართ აგრესიას გააგრძელებს, ევროკავშირს რუსეთის წინააღმდეგ სანქციები აქვს მზად.

გაიგე მეტი: