პრეზიდენტის, სალომე ზურაბიშვილის განცხადებით, უკრაინასთან დაკავშირებით შექმნილი სიტუაცია არის ნიშანი იმისა, თუ რამდენად არის რუსეთის პოლიტიკა პროვოკაციაზე გადასული. ამაზე ზურაბიშვილმა პოლონეთის პრეზიდენტთან ერთად გამართულ ბრიფინგზე ისაუბრა.

"ძალიან მნიშვნელოვანია დღეს, რომ ჩვენ მოგვეცა საშუალება გავცვალოთ ინფორმაცია იმ ძალიან რთული ვითარების შესახებ, რაც დღეს არის უკრაინის მდგომარეობა და უკრაინის მიმართ გამოხატული აგრესია რუსეთის მხრიდან.

ის აგრესიული ქმედებები, მუქარა, ეს იქნება კიბერშეტევები, თუ პირდაპირ სამხედრო ძალების უზომოდ გაზრდა უკრაინის საზღვარზე, თუ იგივე სამხედრო ძალების გააქტიურება შავ ზღვაზე, ეს ყველაფერი არის ნიშნები იმისი, თუ რამდენად დღევანდელი რუსეთის პოლიტიკა არის გადასვლა პროვოკაციაზე, რაზედაც მთელი ევროპული დასავლური სამყარო პასუხობს მოლაპარაკებებით, მცდელობებით, რომდ არეგულირდეს ეს მდგომარეობა და დეესკალიციისკენ წავიდეს ეს დაძაბული ვითარება, მაგრამ დეესკალაციისთვის, როგორც მშვიდობიანი მოლაპარაკებებისთვის საჭიროა, რომ ორივე მხარე მზად იყოს", — თქვა მან.

საქართველოს პრეზიდენტმა ქვეყნის სახელით სრული სოლიდარობა გამოხატა უკრაინის მიმართ და აღნიშნა, რომ საფრთხეები, რაც არსებობს, ემუქრება მთლიანად ევროპის უსაფრთხოებას და სადაც ევროპის უსაფრთხოებაზეა საუბარი, ასევე, არის საქართველოს უსაფრთხოებაზეც.

"ამ ძალიან დაძაბულ ვითარებაში მე მინდა, რომ საქართველოს სახელით გამოვხატო ჩვენი სრული სოლიდარობა ჩვენი მეგობარი უკრაინის მიმართ და არამხოლოდ უკრაინის მიმართ, რამეთუ ის საფრთხეები, რაც არსებობს, რეალურად არის საფრთხეები, რომელიც ემუქრება მთლიანად ევროპის უსაფრთხოებას. თუ ვლაპარაკობთ ევროპის უსაფრთხოებაზე, ეს ასევე, არის ჩვენი უსაფრთხოება", — განაცხადა ზურაბიშვილმა.

პოლონეთის პრეზიდენტი საქართველოში გავლით არის, ტრანზიტული რეისის გამო. სწორედ ამიტომ, ზურაბიშვილმა მასთან საერთო ბრიფინგი აეროპორტში გამართა. ორივე პრეზიდენტმა გამოხატა უკრაინის მიმართ სოლიდარობა და დაგმო რუსეთის ქმედებები.

გაიგე მეტი: