ევროპარლამენტარის, სვენ მიკსერის განცხადებით, ქართველი პოლიტიკოსები კომპრომისზე წასვლის უნარს სათანადოდ არ აფასებენ. მისი თქმით, ეს დასანანია, რადგან მმართველმა პარტიამ და ოპოზიციამ რეზოლუციაში საერთო პოზიციის გამოხატვის შესაძლებლობა ხელიდან გაუშვეს.

"ვფიქრობ ქართველ პოლიტიკოსებს შორის კომპრომისზე წასვლის უნართან მიმართებაში სათანადო დაფასება არ არის, ეს მიიჩნევა სისუსტედ, რაც დასანანია. მაგალითად, ნებისმიერი კომპრომისი ევროპარლამენტში სიმწიფის ნიშანია. ვფიქრობ, ორივე მხარემ, ოპოზიციამაც და მმართველმა პარტიამაც, უნდა იფიქროს, როგორ შეუძლიათ კომპრომისის სულისკვეთების გაუმჯობესება, რახან მმართველ პარტიას აქვს უმრავლესობა, პირველი ნაბიჯები მათგან უნდა გადაიდგას", — აღნიშნა მან.

მისივე თქმით, პოლიტიკოსებთან კომუნიკაცია აძლევს იმის თქმის საშუალებას, რომ მათი პოზიციები დრამატულად განსხვავებული არ არის — ყველა მხარს უჭერს უკრაინასა და მის ტერიტორიულ მთლიანობას და აცნობიერებს რუსეთის აგრესიის საფრთხეს არა მხოლოდ საქართველოსა და უკრაინისთვის, არამედ გლობალური უსაფრთხოებისთვის.