სოციალური მომსახურების სააგენტოს გაფიცული თანამშრომლები თბილისში, მთავრობის კანცელარიასთან, ხოლო ბათუმში, აჭარის ჯანდაცვის სამინისტროსთან აქციებს მართავენ. მათი მოთხოვნა პრემიერმინისტრთან შეხვედრაა. როგორც ერთი-ერთი გაფიცული სოციალური აგენტი, თეა ნარიმანიშვილი ამბობს, პროტესტის გამოხატვა მთავრობის კანცელარიასთან მას შემდეგ გადაწყვიტეს, რაც ჯანდაცვის სამინისტროსგან მათ მოთხოვნებზე პასუხი ვერ მიიღეს.

"დღეს იმიტომ მოვედით ჩვენ კანცელარიასთან, რომ ჯანდაცვის სამინისტროს მხრიდან არავინ არ გამოგვეხმაურა, არავინ არ იქნება ჩვენთან შეხვედრა. არც ჩვენმა უშუალო დირექტორმა, არც მინისტრის მოადგილემ, არ მინისტრმა. ანუ, დაგვტოვა აბსოლუტურად უყურადღებოდ, არ მოგვისმინა. ცალმხრივად იღებს გადაწყვეტილებას. ისეთ გადაწყვეტილებებს, რომლებსაც ჩვენ არ ვეთანხმებით", — განაცხადა ნარიმანიშვილმა TV ეთერში.

აჭარის ჯანდაცვის მინისტრთან, ნინო ნიჟარაძესთან შეხვედრას ითხოვენ სააგენტოს გაფიცული თანამშრომლები ბათუმში.

"ჩვენ ვითხოვთ პირველ რიგში, ხელფასების მატებას, დეკრეტულ ანაზღაურებას, დაზღვევას ვითხოვთ. ერთთვიანი ხელშეკრულებები გავქვს და ამ ხელშეკრულებების უვადოობას ვითხოვთ და ვითხოვთ პრემიერმინისტრთან და ჩვენს მინისტრთან შეხვედრას", — განაცხადა ერთ-ერთმა სოციალურმა აგენტმა.

ამ აქციების დაანონსების შემდეგ, გუშინ, 19 აგვისტოს, სოციალური აგენტების ნაწილმა ზეწოლაზე დაიწყო საუბარი. თეა ნარიმანიშვილმა On.ge-ს უთხრა, რომ "ზემდგომს" არ სურდა გაფიცულიყვნენ და ერთ-ერთ თანამშრომელზე ზეწოლა განხორციელდა.


სოციალური სააგენტოს 400-მდე თანამშრომელი გაიფიცა. დღეს მათი პროტესტის პირველი დღეა. ისინი ანაზღაურების გაზრდასა და სამუშაო პირობების გაუმჯობესებას ითხოვენ. ჯანდაცვის სამინისტროსთან გამართული აქციის პარალელურად, სადაც სააგენტოს თანამშრომლები მინისტრთან შეხვედრას ითხოვდნენ, ზურაბ აზარაშვილმა მთავრობის კანცელარიის შენობაში ბრიფინგისას განაცხადა, რომ მათ ხელფასების ზრდას უკვე დაჰპირდნენ და გაზრდილი ანაზღაურება მათი შრომის ადეკვატურია.

ხელფასების ზრდის შესახებ განცხადება სააგენტომ ჯერ კიდევ გუშინ, გვიან ღამით, გაფიცვამდე რამდენიმე საათით ადრე გაასაჯაროვა. განცხადებაში ვკითხულობთ, რომ სოციალური აგენტის ხელფასი 250 ლარიდან 400 ლარამდე გაიზრდება, უფროსი სოციალური აგენტის კი 550 ლარიდან 700 ლარამდე. ასევე, ოჯახებში შესრულებული ვიზიტების ფარგლებში, ერთ შევსებულ დეკლარაციაზე სოციალური აგენტები 6 ლარის ნაცვლად 10 ლარს მიიღებენ.

გაფიცული თანამშრომლები შეთავაზებულ პირობებზე არ თანხმდებიან. მათი სურთ ანაზღაურების გაზრდა 100%-მდე, ასევე, რეგიონულ განყოფილებებსა და თბლისის ცენტრებში ერთი და იგივე პოზიციებზე დასაქმებულთა ანაზღაურების გათანაბრება. გარდა ამისა, ისინი ითხოვენ სამსახურეობრივი მოვალეობის შესრულებისას გაწეული ხარჯებს ანაზღაურებას და დამატებითი სამუშაოს დაკისრების შემთხვევაში, შესაბამისად, დამატებით ანაზღაურებას. სააგენტოს თანამშრომლებს, ასევე, სურთ ხელშეკრულებით განისაზღვროს ხელფასის ყოველწლიური კალკულაცია ინფლაციის კურსის გათვალისწინებით. მოთხოვნები ეხება სააგენტოს ცენტრებში დასაქმებულ პირთა რაოდენობის ზრდას, რათა "არ მოუწიოს დასაქმებულს სხვა დამატებითი პოზიციების ფუნქცია მოვალეობის შეთავსება".

გაიგე მეტი: