სანატორიუმ ქართლის მაცხოვრებლების თქმით, შენობაში ახალი ბზარები გაჩნდა, ხოლო, ერთ-ერთი დევნილის სახლში ჭერი ჩამოინგრა. ისინი კიდევ ერთხელ აღნიშნავენ, რომ ჯანდაცვის მინისტრის, ზურაბ აზარაშვილის მიერ დასახლებაში მომხდარის "უბედური შემთხვევად" მოხსენიება არასწორია.

"გავიგე, რომ წუხელ ისევ ახალი ბზარი გაჩნდა, ოთახში ქალბატონი ამბობს, ჭერი ჩამომენგრაო, ეს ქალბატონი არის ცხინვალიდან დევნილი [...] ამ ყველაფერს უბედური შემთხვევა დაარქვეს სახელად, მაგრამ ამ ყოველდღიურ ნგრევებს შემთხვევითობას ვერ დავარქმევ.

დროა, გავიღვიძოთ, გაიღვიძონ, და ხალხს მივცეთ ცხოვრების უფლება, არ გაგვწირონ, ჩვენ სიცოცხლეს ვითხოვთ. ჩვენ თუ ახლა გავჩერდით, ისევ ვბრუნდებით 30 წლით უკან. 30 წელი კიდევ ჩემი შვილი რაღაცას რომ ელოდოს, ეს იგივე მორიგი ტყუილია, იქ მოდის ერთი და იგივე მატყუარა მთავრობა", — აცხადებს ერთ-ერთი დევნილი ფორმულასთან.

16 იანვარს, სანატორიუმ ქართლის შენობასთან დევნილი გარდაიცვალა. ადგილობრივების თქმით, ის სახურავიდან გადმოხტა და თვითმკვლელობის მიზეზი მათი მოთხოვნების შეუსრულებლობაა. სანატორიუმის ყოფილ შენობაში მცხოვრები დევნილები საცხოვრებელ პირობებს აპროტესტებენ. მათი განცხადებით, შენობა ავარიულია და საცხოვრებლად საშიში. რამდენიმე კვირაა პასუხისმგებელ პირებთან, მათ შორის ჯანდაცვის მინისტრთან შეხვედრას ითხოვენ. საქმეზე გამოძიება თვითმკვლელობამდე მიყვანის მუხლით დაიწყო.

17 იანვარს ჯანდაცვის მინისტრმა, ზურაბ აზარაშვილმა განაცხადა, რომ სანატორიუმ ქართლში მომხდარი ფაქტი "უბედური შემთხვევაა" და ის დევნილთა პრობლემებს არ უნდა დაუკავშირონ.

ამავე თემაზე: