სერბ ჩოგბურთელსა და მსოფლიოს ამჟამინდელ პირველ ჩოგანს, ნოვაკ ჯოკოვიჩს, თვითიზოლაციის წესების დარღვევის გამო შეიძლება ჯარიმის გადახდა ან პატიმრობა შეეფარდოს. აღნიშნული წესი ჩოგბურთელმა წინა თვეში დაარღვია, როცა მას კოვიდდადებითი სტატუსი დაუდასტურდა.

34 წლის ჯოკოვიჩი ამჟამად ავსტრალიის ღია პირველობაზე ასპარეზობს, თუმცა, ზემოხსენებული საქმის გამო მას შეიძლება ქვეყანა დაატოვებინონ.

12 იანვარს ჩოგბურთელმა განაცხადა, რომ თავისი სტატუსის შესახებ იცოდა, როცა 18 დეკემბერს ერთ-ერთ გაზეთთან ინტერვიუზე და ფოტოსესიაზე მივიდა. მისი თქმით, ეს "შეცდომა" იყო.

ჯოკოვიჩმა "ადამიანური შეცდომა" თავის გუნდსაც მიაწერა და აღნიშნა, რომ მათ შესაბამის დოკუმენტში არ ასახეს, რომ ჩოგბურთელი ავსტრალიაში გამგზავრებამდე ორკვირიან პერიოდში ესპანეთშიც იმყოფებოდა.

სერბი იურისტების თქმით, ეს ყველაფერი ქვეყანაში ეპიდსიტუაციის გამო დაწესებული მკაცრი რეგულაციების დარღვევაა, რაც ჯარიმას ან სამ წლამდე თავისუფლების აღკვეთას ითვალისწინებს, თუმცა, უფრო სავარაუდოა, დამნაშავეს საზოგადოებისთვის სასარგებლო შრომა დაევალოს.

აღსანიშნავია, რომ ბოლო პერიოდში ეს ჯოკოვიჩის გარშემო შექმნილი ხმაურის ერთადერთი მიზეზი არ არის. ცოტა ხნის წინ, ჩოგბურთელს, სავარაუდოდ, აუცრელობის გამო ავსტრალიაში არ უშვებდნენ, მაგრამ სასამართლოს გადაწყვეტილებით, მან ქვეყანაში დარჩენის უფლება მიიღო.

ამ ყველაფრის მიუხედავად, სერბეთის ხელისუფლების წარმომადგენლები და მედიასაშუალებები ჯოკოვიჩს მხარს უჭერენ. ერთ-ერთ გამოცემაში გამოქვეყნებულ ოპ-ედში ბელგრადის ვიცე-მერი, გორან ვესიჩი, ავსტრალიის იმიგრაციის მინისტრს, ალექს ჰოუკს, აკრიტიკებს. ჯოკოვიჩთან და მის საქმესთან დაკავშირებული კითხვების მიუხედავად, ჩოგბურთელის ავსტრალიურ ტურნირში მონაწილეობას მხარს უჭერდა ქვეყნის პრემიერმინისტრი, ანა ბრნაბიჩიც.