ველური ბუნებისა და ბიომრავალფეროვნების დაცვა მხოლოდ გარემოს დამცველი ორგანიზაციების საზრუნავი როდია. ამ საქმეში დიდ როლს თამაშობს თითოეული ჩვენგანი, რადგან თავადვე ვართ ეკოსისტემის ნაწილი და ნებისმიერი პროცესი, რომელიც ჩვენს გარემომცველ ბუნებაში ხდება, ჩვენზეც აისახება. სწორედ ამიტომ, როცა ხევსურეთში, დასახლებულ პუნქტთან მიახლოებული ნიამორი ადგილობრივებმა შენიშნეს, გადაწყვიტეს, ფშავ-ხევსურეთის ეროვნული პარკს დაკავშირებოდნენ და ერთად დაებრუნებინათ ცხოველი მის საბინადროში.

როგორც დაცული ტერიტორიების სააგენტო იტყობინება, ნიამორის პოვნისა და მისი შინ დაბრუნების საქმეში რეინჯერებს ადგილობრივი მცხოვრებლებიც დაეხმარნენ. მისი დაჭერა და მოგვიანებით ეროვნული პარკის ტერიტორიაზე დაბრუნებაც ყველა შესაბამისი წესის დაცვით მოხდა. სააგენტოს ცნობით, ყოველდღიური მეთვალყურეობისთვის ნიამორს, რომელიც წითელ ნუსხაში შეტანილი სახეობაა, ნიშანიც გაუკეთეს.

"ბოლო წლებში მიმდინარე დაკვირვებამ აჩვენა, რომ ნიამორის რიცხოვნება ყოველწლიურად იზრდება. დაცული ტერიტორიების სააგენტო მუდმივად აკვირდება მათ რიცხოვნებას ფოტოხაფანგების, რეინჯერებისა და შესაბამისი აღრიცხვის მეთოდების საშუალებით", — წერს სააგენტო.