ქართული ოცნების ლიდერი და საკონსტიტუციო კომისიის წევრი ეკა ბესელია მიიჩნევს, რომ კონსტიტუციით ქორწინების განსაზღვრა, როგორც ქალისა და კაცის ერთობა, საზოგადოების უმრავლესობის სურვილია და ეს არ შეზღუდავს არავის უფლებას:

"ყველგან ჩავატარეთ საერთო სახალხო განხილვა და ამ ცვლილების მიმართ იყო ერთსულოვანი განწყობა. მეორეს მხრივ, ეს იყო ჩვენს საარჩევნო პროგრამაშიც. ეს ჩანაწერი არავის უფლებას არ ზღუდავს და არ აკნინებს, თუ ჩავიხედავთ ევროპის კონვენციაში, ადამიანის უფლებებისა და თავისუფლებების შესახებ, მეთორმეტე მუხლში სწორედ ქალი და კაცი წერია, სადაც საუბარია ქორწინებაზე და მე არ მგონია რომ ამ ჩანაწერზე უარი უნდა ვთქვათ".

საკონსტიტუციო კომისიის სამუშაო ჯგუფისთვის შეთავაზებული პროექტით, ქორწინება განისაზღვრება, "როგორც ქალისა და მამაკაცის კავშირი".

გეი ქორწინების კონსტიტუციური აკრძალვა ქართული ოცნების ერთ-ერთი მთავარი წინასაარჩევნო დაპირება იყო.

ერთი და იმავე სქესის მქონე პირთა ქორწინება კანონმდებლობით ისედაც აკრძალულია, ხოლო ლგბტ ჯგუფების მხრიდან ქორწინების თანასწორობის მოთხოვნა არასდროს დამდგარა. მიუხედავად ამისა, გასული წლების განმავლობაში თემა არა ერთხელ გამხდარა პოლიტიკური მანიპულაციების საგანი.