თბილისის მერია აღმაშენებლის გამზირის რეაბილიტაციას იწყებს. რეაბილიტაცია ჩაუტარდება აღმაშენებლის გამზირის მონაკვეთს თამარ მეფის გამზირიდან მარჯანიშვილის მოედნის ჩათვლით.

კახა კალაძის ცნობით, პროექტის ფარგლებში განხორციელდება შემდეგი სამუშაოები:

  • სრულად შეიცვლება დაზიანებული ქვაფენილი და დაიგება ასფალტის ახალი საფარი;

  • მოწესრიგდება სანიაღვრე ქსელი, განახლდება ტროტუარები და მოეწყობა ველობილიკი;

  • დამონტაჟდება თანამედროვე LED ლამპიონები, ხოლო მარჯანიშვილის მოედანზე განახლდება გამწვანების კუნძულები;

  • მთელი ინფრასტრუქტურა სრულად ადაპტირდება შშმ პირებისთვის.

ტენდერი სარეაბილიტაციო სამუშაოების შესყიდვაზე უკვე გამოცხადებულია და 3 სექტემბერს დასრულდება.

"ჩვენ აქტიურად ვაგრძელებთ ინფრასტრუქტურული პროექტების განხორციელებას დედაქალაქის სხვადასხვა რაიონსა და უბანში. ჩვენი მიზანია, ქალაქში შევქმნათ მოწესრიგებული, უსაფრთხო და თანამედროვე გარემო, რომელიც ყოველდღიურად ჩვენი მოქალაქეების ინტერესებს მოემსახურება და რაც მთავარია, ათეულ წლებს გაუძლებს. ამჯერად, ვგეგმავთ აღმაშენებლის გამზირის მნიშვნელოვანი მონაკვეთის რეაბილიტაციას — თამარ მეფის გამზირიდან მარჯანიშვილის მოედნის ჩათვლით. პროექტის ფარგლებში, მოწესრიგდება სანიაღვრე ქსელი, რეაბილიტაცია ჩაუტარდება ტროტუარსა და საავტომობილო გზას, არსებული დაზიანებული ქვაფენილი ასფალტის ახალი საფარით ჩანაცვლდება. მოეწყობა ველობილიკი. ასევე, განახლდება გარე განათების ქსელი და დამონტაჟდება LED ლამპიონები. მოედანზე განახლდება გამწვანების კუნძულები და ინფრასტრუქტურა ადაპტირდება შშმ პირებისთვის", — განაცხადა კახა კალაძემ