მთავრობის ადმინისტრაციაში გამართულ ბრიფინგზე "ტვ პირველის" ჟურნალისტმა ირაკლი კობახიძეს ჰკითხა, რაზე საუბრობს ექსპრემიერ ირაკლი ღარიბაშვილის 17 აგვისტოს გავრცელებულ წერილში. რაზეც კობახიძემ განაცხადა, რომ "არ იცის, რაზეა საუბარი". რაც შეეხება ღარიბაშვილის და მისი ოჯახის წევრების უსაფრთხოებას, პრემიერის თქმით, მისი და მისი ოჯახის უსაფრთხოება დაცულია, ეს "სახელმწიფოს პასუხისმგებლობაა".

"ვნახე ეს განცხადება. არ ვიცი, რაზეა საუბარი, მე ვიცი ერთი, რომ არის კონკრეტული განაჩენი დამდგარი. დანარჩენი არის მთლიანად სამართალდამცავი ორგანოების საქმე. მე საერთოდ ვერ გავაკეთებ კომენტარს ამ განცხადებაზე, მათ შორის იმის გამოც, რომ ირაკლი ღარიბაშვილი ჩემამდე იკავებდა ამ თანამდებობას, შესაბამისად, ჩემთვის ეთიკური თვალსაზრისითაც...

[...] მე მართლა არ ვიცი, რა კომენტარი გავაკეთო. როგორც მისი, ისე მისი ოჯახის უსაფრთხოება არის დაცული, ბუნებრივია. ეს არის ზოგადად სახელმწიფოს პასუხისმგებლობა", — განაცხადა კობახიძემ.

ირაკლი კობახიძისთვის გაუგებარია ირაკლი ღარიბაშვილის "ოჯახის უსაფრთხოება რატომ უნდა იდგეს რისკის ქვეშ".

"მე თეორიულადაც კი ვერ წარმომიდგენია, რა რისკი შეიძლება არსებობდეს, თეორიულადაც კი ვერ წარმომიდგენია", — ამბობს კობახიძე.

ჟურნალისტის კითხვაზე — რა ახალ საქმეზეა საუბარი წერილში, როცა მას სთავაზობენ, რომ ამ დრომდე უცნობი კორუფციული დანაშაული აღიაროს? კობახიძე პასუხობს, რომ ეს სამართალდამცავი უწყებების საქმეა და მას ამის შესახებ ინფორმაცია არ აქვს.

"არ ვიცი, ეს არის სამართალდამცავი უწყებების საქმე, ისინი გაგცემენ ამ კითხვასთან დაკავშირებით პასუხს, თუ რაიმე სხვა საქმე არსებობს, მათგან შეგიძლიათ ეს ინფორმაცია მიიღოთ. სამართალდამცავი უწყებების საქმიანობაში ჭარბი ჩარევა არ ვარგა. ჩვენ გვაქვს რწმენა სამართალდამცავი ორგანოების საქმიანობაში, რომ ისინი კეთილსინდისიერად მოქმედებენ. თუ რაიმე ნიშნები იქნება სხვა დანაშაულის, ისინი არიან ამაზე პასუხისმგებელი და, რაც მთავარია, ეს საზოგადოებისთვის გამჭვირვალეა. თუ რაიმე ახალი ბრალი იქნება, მაგალითად, წაყენებული — არ ვიცი, აქ რაზეა საუბარი, მაგრამ უბრალოდ — თუ მაგალითად ახალი ბრალი იქნება წაყენებული კონკრეტული პირისთვის, ეს გამჭვირვალეა და საზოგადოება გაიგებს ამ ყველაფერთან დაკავშირებით, ვერაფერი ვერ დაიმალება. ეს არის მთავარი და თქვენ შეგიძლიათ ამას ყოველდღე მიადევნოთ", — განაცხადა კობახიძემ.