2026 წელს რუსეთში გამოცემულ გარდაცვლილი პაპ ფრანცისკეს ავტობიოგრაფიული წიგნის რუსულ გამოცემაში ჰომოსექსუალობასთან დაკავშირებული ფრაგმენტები დააცენზურეს. იგივე მონაკვეთები ამოღებულია წიგნის ელექტრონული ვერსიიდანაც.

ამის შესახებ ივლისის ბოლოს წიგნის მაღაზია Primus Versus-მა თავის Telegram-არხზე განაცხადა და გვერდების ფოტოები გამოაქვეყნა. კვირას, 16 აგვისტოს, ცენზურის ფაქტზე ყურადღება საზოგადოებრივმა ჯგუფმა "ქრისტიანები ომის წინააღმდეგ" გაამახვილა.

როგორც DW წერს, ცენზურის ქვეშ მოჰყვა პაპ ფრანცისკეს სიტყვები იმის შესახებ, რომ ჰომოსექსუალი და ტრანსგენდერი ადამიანები მიწვეულნი არიან ეკლესიაში. პაპი ასევე წერდა, რომ ასეთ ადამიანებს შეუძლიათ მონათვლა და ნათლიობა იმავე პირობებით, როგორც სხვა მორწმუნეებს და რომ ჰომოსექსუალობა "არ არის დანაშაული, არამედ ადამიანური რეალობაა".

გარდა ამისა, პაპის წიგნის რუსულ ვერსიაში შავად დაიფარა მონაკვეთი ვატიკანის დეკლარაციის, Fiducia supplicans-ის შესახებ. ეს დოკუმენტი მღვდლებს უფლებას აძლევდა, ლიტურგიის მიღმა დაელოცათ ერთსქესიანი წყვილები მათი კავშირის ქორწინებად აღიარების გარეშე.

Deutsche Welle წერს, რომ 2022 წელს რუსეთში "ლგბტ პროპაგანდის" აკრძალვის შესახებ კანონის მიღების შემდეგ, ცალკეული გამოცემები გაყიდვიდან ამოიღეს, ხოლო ზოგიერთ წიგნში მთელი პასაჟები წაშალეს ან შავად დაფარეს. The Insider-ის გამოთვლებით, ბოლო ოთხი წლის განმავლობაში გაყიდვიდან დაახლოებით 600 დასახელების წიგნი გაქრა.

2024 წლის თებერვალში, მხოლოდ რუსული "მეგამარკეტის" ქსელში გაყიდვიდან 252 წიგნი ამოიღეს, მათ შორის ფიოდორ დოსტოევსკის, ოსკარ უაილდისა და სტივენ კინგის ნაწარმოებები. კიდევ 153 დასახელების წიგნის კონფისკაცია მოხდა გამომცემლობების — Popcorn Books-ისა და Individuum-ის თანამშრომლების წინააღმდეგ აღძრული სისხლისსამართლებრივი დევნის ფარგლებში. რუსეთში 50-ზე მეტი მწერალი "უცხოელ აგენტად" გამოცხადდა.