აშშ-ის სახელმწიფო მდივანმა მარკო რუბიომ საერთაშორისო სისხლის სამართლის სასამართლოს (ICC) პრეზიდენტისა და უფროსი პროკურორის/იურისტის წინააღმდეგ სანქციების დაწესების შესახებ განაცხადა. ინფორმაციას BBC ავრცელებს.

მათი ცნობით, ეს ნაბიჯი ტრამპის ადმინისტრაციის მორიგი ესკალაციაა კამპანიაში, რომელიც მიზნად იმ სასამართლოს "დაშლას" ისახავს, რომელსაც 120-ზე მეტი წევრი ქვეყნისგან აქვს მინიჭებული უფლებამოსილება, გამოიძიოს ომის დანაშაულები.

რუბიომ აღნიშნა, რომ აშშ სანქციებს უწესებს ICC-ის პრეზიდენტს, ტომოკო აკანეს (იაპონია) და უფროს იურისტს, აბდულაი სეის (სენეგალი), იმ მცდელობებში მონაწილეობისთვის, რომლებიც "ისეთი ოფიციალური პირების დევნას ისახავს მიზნად, რომელთა მთავრობასაც ICC-ის იურისდიქციაზე თანხმობა არ განუცხადებია".

ICC-ში განაცხადეს, რომ ისინი მხარს უჭერენ თავიანთ თანამშრომლებს და მიაჩნიათ, რომ რუბიოს მიერ გამოცხადებული მსგავსი ზომები "სამართლის უზენაესობას უთხრის ძირს".

რუბიომ სასამართლო დაადანაშაულა იმაში, რომ ის „კორუმპირებული და უკიდურესად პოლიტიზებული სუპრანაციონალური სასამართლოა, რომელმაც ბოროტად გამოიყენა თავისი უფლებამოსილება და გადააჭარბა მანდატს".

არც პრეზიდენტ ტრამპს და არც თეთრ სახლს ამ ეტაპზე კომენტარი არ გაუკეთებიათ.

ტრამპის ადმინისტრაციას უკვე გამოცხადებული აქვს სანქციები ICC-ის სულ მცირე 11 ოფიციალური პირის, მათ შორის ცხრა მოსამართლისა და მთავარი პროკურორის წინააღმდეგ. სანქციები აქტივების გაყინვას, მოგზაურობის აკრძალვასა და ამერიკული კომპანიებისგან მომსახურების მიღების შეზღუდვას მოიცავს.

BBC წერს, რომ ეს სანქციები იმ გამოძიებების გამო დაწესდა, რომლებსაც ICC ავღანეთში აშშ-ის პერსონალის წინააღმდეგ ატარებდა, ასევე იმ ორდერების გამო, რომლებიც სასამართლომ ისრაელის მაღალჩინოსნების, მათ შორის პრემიერმინისტრ ბენიამინ ნეთანიაჰუს წინააღმდეგ გააცა ღაზაში სავარაუდო ომის დანაშაულების გამო.

ნეთანიაჰუმ უარყო ომის დანაშაულებების ბრალდებები და სასამართლო ანტისემიტიზმით მოტივირებაში დაადანაშაულა. არც აშშ და არც ისრაელი არ არიან ICC-ის წევრები. თუმცა, პალესტინის სახელმწიფო ICC-ის წევრი 2015 წელს გახდა, რამაც გზა გაუხსნა სასამართლოს მიერ პალესტინის ტერიტორიაზე სავარაუდოდ ჩადენილი დანაშაულების შესწავლას.