იტალიური მედიის ცნობით, კვირას საღამოს იტალიის კუნძულ სიცილიაზე, ეტნას მთაზე ლაშქრობისას 30 წლამდე აშშ-ის მოქალაქეს მეხი დაეცა. მას გული გაუჩერდა. ინფორმაციას Deutsche Welle ავრცელებს.

სავარაუდოდ, კაცი ეტნას აღმოსავლეთ ფერდობზე მდებარე აკრძალულ ზონაში, სადაც ამჟამად არანორმალურად მაღალი ვულკანური აქტივობა შეინიშნება, მარტო ლაშქრობდა.

ეტნა ევროპაში ყველაზე მაღალი მოქმედი ვულკანია (3 324 მეტრი) და ტურისტების დიდ ნაკადს იზიდავს — განსაკუთრებით ახლა, როდესაც ვიზიტორები ლავის შთამბეჭდავი ამოფრქვევისა და კვამლის ფოტოების გადასაღებად მიდიან.

ხელისუფლების განცხადებით, კაცმა შესაძლოა უგულებელყო აკრძალვის ნიშნები, რათა ახალი კრატერისკენ ასულიყო, რა დროსაც იგი შტორმში მოყვა.

საგანგებო სიტუაციების სამსახურის ცნობით, როდესაც სამაშველო ვერტმფრენი ადგილობრივი დროით დაახლოებით 20:00 საათზე ადგილზე მივიდა, აშშ-ის მოქალაქეს გული უკვე გაჩერებული ჰქონდა. სავარაუდოდ, მას მეხი იმ დროს დაეცა, როდესაც ხეების ზოლს ზემოთ, სიმაღლეზე გადაადგილდებოდა.

DW წერს, რომ მაშველები კაცის გადარჩენას მაშინ ცდილობდნენ, როდესაც იგი მთის როკა-კაპრას მიდამოებიდან (ზღვის დონიდან დაახლოებით 1 400 მეტრზე) გამოჰყავდათ. კატანიის მახლობლად მდებარე კანიცაროს საავადმყოფოში მიყვანისას იგი გარდაცვლილად გამოცხადდა.

მომხდარ ფაქტზე გამოძიება გრძელდება.