ოკუპირებულ აფხაზეთში საქართველოდან საწვავის შეტანაზე საუბრისას პრემიერმა კობახიძემ განაცხადა, რომ ინიციატივა მოდიოდა ოკუპირებული ტერიტორიიდან, თუმცა არ დაუკონკრეტებია ბიზნესის მხრიდან იყო ინიციატივა, მოსახლეობიდან, თუ საოკუპაციო რეჟიმიდან. მისი თქმით, სავარაუდოდ ბიზნესის მხრიდან იყო დაინტერესება.

"ჩვენთან შეთანხმებული იყო, რა თქმა უნდა, ეს ყველაფერი. არსებობს საკანონმდებლო აქტები, რომლის საფუძველზეც ასეთი ტრანზაქციები ხორციელდება და, რა თქმა უნდა, მთავრობასთან იყო შეთანხმებული ეს ნაბიჯი. როდესაც ბიზნესმა გამოთქვა ასეთი ინტერესი, როდესაც ბიზნესმა მიიღო ეს შეთავაზება, ჩვენთან იყო შეთანხმებული და ჩვენ დავინახეთ სარგებელი, რა თქმა უნდა, მათ შორის ნდობის აღდგენის კუთხით.

[...] ინიციატივა იქიდან მოდიოდა. იქ არ ვიცი, კონკრეტულად ვისთან ჰქონდათ საუბარი, მაგრამ შეიქმნა საწვავის დეფიციტი. ეს იყო პრობლემა და თხოვნა იყო ამ საწვავის დეფიციტის შევსებასთან დაკავშირებით, რასთან დაკავშირებითაც მოგვმართა ბიზნესმა და ჩვენ მივიღეთ მხარდამჭერი გადაწყვეტილება. სავარაუდოდ, იქიდანაც იყო ბიზნესის [ინტერესი], რომლებსაც ჰქონდა დეფიციტი, საწვავის დეფიციტი, შეიძლება მათ მიმართეს, შეიძლება სხვა მიმართა. მაგრამ ჩვენთვის მთავარი იყო ის, რომ იყო დეფიციტი, გაკეთდა იქიდან მიმართვა ბიზნესის მიმართ და შემდეგ ჩვენთან შეთანხმდა ეს საკითხი და ასე დალაგდა ეს ყველაფერი", — განაცხადა კობახიძემ.

მისივე თქმით, ე.წ. საზღვარზე გადატანის პროცესში საქართველოს მთავრობა არ ყოფილა ჩართული, ესეც "ბიზნესის მოლაპარაკების საგანი იყო და მათ მოილაპარაკეს ყველაფერთან დაკავშირებით". კობახიძემ დღეს გამართულ ბრიფინგზე ისიც თქვა, რომ ხელისუფლებისთვის ოკუპირებულ ტერიტორიაზე საწვავის შეტანა თავიდან ბოლომდე ნდობის აღდგენის საკითხთანაა დაკავშირებული.

"ჩვენთვის ეს არის თავიდან ბოლომდე ნდობის აღდგენის საკითხთან დაკავშირებული. ჩვენთვის, როგორც ხელისუფლებისთვის, მთავარი ამოსავალი წერტილი — აქ ახლა ფულის შოვნა არ იყო... შეიძლება ბიზნესის მიზანი იყოს ფულის შოვნა, ჩვენი მიზანი არის ნდობის აღდგენა. ერთადერთი მოტივი, რატომაც მივიღეთ მხარდამჭერი გადაწყვეტილება, იყო სწორედ ეს ნაბიჯი, ნდობის აღდგენისკენ მიმართული ნაბიჯი", — თქვა კობახიძემ.

ირაკლი კობახიძის თქმით, ოკუპირებულ აფხაზეთში დაახლოებით 680 ტონა საწვავია შეტანილი. კრიზისი გადასაჭრელად მომდევნო დღეებში დამატებითი საწვავის ტრანსპორტირებაა დაგეგმილი, რაც პრობლემას აღმოფხვრის:

"გუშინდელი მდგომარეობით დაახლოებით 680 ტონა საწვავია შეტანილი და ეს არის საკმარისი იმისთვის, რომ ჰუმანიტარული კრიზისი გადაიჭრას აფხაზეთში. მომდევნო დღეებში დაგეგმილია დამატებითი საწვავის ტრანსპორტირება აფხაზეთის რეგიონში, რაც აღმოფხვრის პრობლემას“, – თქვა ირაკლი კობახიძემ ბრიფინგზე.

ჟურნალისტის კითხვაზე — რისკი, რომ ეს საწვავი რუსეთის ხელში აღმოჩენილიყო, მან პირადად როგორ დააზღვია?, კობახიძემ განაცხადა, რომ "აბსოლუტურად არასერიოზულია საუბარი იმაზე, რომ რუსეთი მარაგდება იმ საწვავით".

"ბევრი აბსურდული განცხადება მოვისმინეთ ამასთან დაკავშირებით. ისტერიული კამპანია იყო, იმიტომ რომ ჩვენს ოპონენტებს არ მოსწონთ ნდობის აღდგენის პროცესი და ისტერიკა ამას უკავშირდება. რაც შეეხება რუსეთის ჯარების მომარაგებას, რუსეთის მოხმარება რაც არის, შეგიძლიათ გადაამოწმოთ, ამის 0.001%-ია ის საწვავი, რაც შედის აფხაზეთში, აბსოლუტურად არასერიოზულია საუბარი იმაზე, რომ რუსეთი მარაგდება იმ საწვავით, რომელიც შედის აფხაზეთში. მერე საუბარი იყო ბაზების მომარაგებაზე. ბაზები ჰგონიათ, რომ ბორბლებზე დგას და აქეთ-იქით მოძრაობს. სრული აბსურდია ლაპარაკი იმაზე, რომ სამხედრო ბაზა იყო მომარაგებული ამ საწვავით. ნებისმიერ ბაზას თავისი საწვავის მარაგი აქვს და ეს საწვავი მოიხმარება ძალიან იშვიათად. იმიტომ რომ ბაზა არ არის მოძრავი ობიექტი, ბაზა არის სტატიკური ობიექტი. ყველანაირ აბსურდში შევიდნენ. იმიტომ, რომ აქვთ ისტერიკა. როდესაც ხედავენ, რომ გარკვეულმა ნაბიჯებმა შეიძლება ხელი შეუწყოს ნდობის აღდგენას, ჩვენს ოპონენტებს აქვთ ისტერიკა", — განაცხადა ირაკლი კობახიძემ.