2014 წლის ლომისობას დაკარგული 17 წლის გურამ დადიანიძის სოციალურ ქსელში ოსურ დიალექტზე დაწერილი სტატუსი გამოჩნდა: Арцыд растаг, რაც თარგმანში ნიშნავს "მოვიდა დრო". 12 წლის წინ გათიშული სოციალური ქსელის გააქტიურების შემდეგ, გამოძიებამ უნდა დაადგინოს საიდან მოხდა პოსტის დაწერა.

გურამ დადიანიძის დედა სოფო ბიბილაშვილი „ტვ პირველთან“ სატელეფონო ინტერვიუში ამბობს, ეს მისი სახით გავრცელებული პირველი შეტყობინება არ ყოფილა.

"ვიცი, რომ გურიკას საიტია და გურიკამ საიტი რომ ჩართო, მაშინ დედასაც მისწერდა და ეტყოდა, რომ მოვდივარ და ცოცხალი ვარ და ესა ვარ. გურიკა გელაშვილ კახას საიდან მისწერდა, რომ როცა დედა ჰყავს იმასა და მამა ჰყავს, მაშინ დედას მისწერდა, მამას მისწერდა, გელაშვილ კახას რაზე მისწერდა? ვიღაცა მაგარად თამაშობს და არ ვიცი, თუ ამ საქმესა სათამაშოდ გახდით და ესე ხალხის მასხარად აგდება გამოდის, იგივე. ახლა თქვენ რომ იყოთ ჩემ ადგილზე და ეგ მესიჯი წაიკითხოთ: "დე, ცოცხალი ვარ" და კახა გელაშვილთან არის მიწერილი... აი, რას იფიქრებთ?

მე, მაგალითად, ვფიქრობ, რომ ეგ არის სიცრუე, იმიტომ რომ გურიკას ქვეყანა ჰყავს ხალხი, ნათესავები, ბიძაშვილები, მამა და ჰყავს, მამა ჰყავს, დედა ჰყავს, ბიძები ჰყავს... ბიძაშვილებს ხომ მისწერდა, ათას [ვინმეს] მისწერდა, რაღა კახა გელაშვილს მისწერა? მე ეჭვი არა მაქვს, აი, 3-4 დაიწერა გურიკას მხრიდან: „დე, ცოცხალი ვარ“, მერე დაიწერა რუსულად რაღაცა "მალე მოვალო" თუ რაღაცა და ახლა დაიწერა „დადგა დროო“. ჩემმა შვილმა ჩემი ფეისბუქი იცის, თუ დაწერა ნდომებოდა, მომწერდა მე. არაფერი არ ვიცი, მართლა არაფერი არ ვიცი. ეს თუ პოლიციამ არ დაადგინა, საიდან მოდის ეს მესიჯები, პროკურატურაშია გადაცემული [საქმე] და გამოჩნდება ყველაფერი. ადვოკატმა მითხრა, რომ დავადგენ ყველაფერსო და დანარჩენი არაფერი არ ვიცი არც მე", — ამბობს გურამ დადიანიძის დედა სოფო ბიბილაშვილი "ტვ პირველთან" სატელეფონო ინტერვიუში.

12 წლის წინ გაუჩინარებულ გურამ დადიანიძის საქმეზე საგამოძიებო მოქმედებები მლეთაში ლომისის სალოცავის მიმდებარედ ტერიტორიაზე 11 აგვისტოს ხელახლა ჩატარდა, რომლის დროსაც გამოირიცხა ვერსია, რომ ის მეწყერმა მოიყოლა.

შინაგან საქმეთა სამინისტრო 12 წლის წინ გაუჩინარებული გურამ დადიანიძის საქმეზე განცხადებას ავრცელებს. უწყება უარყოფს დადიანიძის დედის ბრალდებას, თითქოს საქმე ჯეროვნად არ გამოუძიებიათ. შსს-ს ცნობით, აღნიშნულ საქმეზე ბოლო ერთი თვის განმავლობაში 20-ზე მეტი პირი გამოიკითხა და ვერანაირი საეჭვო გარემოება ვერ აღმოაჩინეს.

უწყების ცნობით, სოციალურ ქსელში გავრცელებული ვიდეო, რომელიც გურამ დადიანიძის გაუჩინარების დღესაა გადაღებული, შუადღის საათებს ასახავს, გამოკითხვის თანახმად კი არასრულწლოვანი ღამის საათებში გაუჩინარდა.

აღნიშნული ვიდეო სოციალურ ქსელში ადვოკატმა ტარიელ კაკაბაძემ გაავრცელა. ჩანაწერში, სავარაუდოდ, ისმის სიტყვები: "არ მიმატოვო, გეხვეწები". დაკარგული ბიჭის დედის მტკიცებით, ეს მისი შვილის ხმაა.