პოლონეთმა საქართველოს, კოლუმბიისა და ვენესუელის მოქალაქეებისთვის ქვეყანაში სამუშაოდ ჩასვლის წესები გაამკაცრა. ახალი რეგულაციით, მუშაობის მიზნით პოლონეთში შესვლის მსურველებისთვის ვიზის მიღება სავალდებულო გახდება.

რეგულაცია, რომელსაც საგარეო საქმეთა მინისტრმა რადოსლავ სიკორსკიმ 10 აგვისტოს მოაწერა ხელი, ძალაში შაბათიდან შევიდა. ის მხოლოდ იმ პირებზე ვრცელდება, რომლებიც პოლონეთში სამუშაოდ მიემგზავრებიან.

სამივე ქვეყნის მოქალაქეებს კვლავ შეუძლიათ პოლონეთში უვიზოდ ჩასვლა ტურისტული ან სხვა ნებადართული მოკლევადიანი ვიზიტის მიზნით.

ის პირები, რომლებიც პოლონეთში 15 აგვისტომდე შევიდნენ, ძველი წესებით ისარგებლებენ. კოლუმბიის მოქალაქეებისთვის მსგავსი მოთხოვნა სამუშაო ვიზასთან დაკავშირებით უკვე 2024 წლის აგვისტოდან მოქმედებდა.

პოლონეთის მთავრობის განცხადებით, საქართველოს, კოლუმბიისა და ვენესუელის მოქალაქეები უვიზო რეჟიმს "სისტემატურად" იყენებდნენ ისე, რომ დასაქმებისთვის აუცილებელ კანონიერ მოთხოვნებს არ აკმაყოფილებდნენ.

ხელისუფლების განმარტებით, ახალი რეგულაციების შემოღების მიზეზი გახდა უკანონო დასაქმება და არალეგალური ყოფნა, ჩრდილოვანი ეკონომიკის გაფართოება, მუშახელის ექსპლუატაცია და ადამიანით ვაჭრობა. მთავრობის შეფასებით, ეს სამი ქვეყანა მაღალი მიგრაციული რისკის მქონე სახელმწიფოებს მიეკუთვნება.

მიგრაციაზე კონტროლის გამკაცრება

ახალი ზომები პოლონეთის მთავრობის უფრო ფართო პოლიტიკის ნაწილია, რომელიც არალეგალური მიგრაციისა და უცხოური ორგანიზებული დანაშაულის წინააღმდეგ ბრძოლას ისახავს მიზნად.

გასულ წელს პოლონეთმა ქვეყნის მასშტაბით დაიწყო ოპერაცია უცხოური კრიმინალური დაჯგუფებების წინააღმდეგ, რომელიც პოლიციური ღონისძიებების გაძლიერებასა და დეპორტაციებს მოიცავდა.

როგორც პოლონური მედია წერს, ამ ოპერაციების ფარგლებში განსაკუთრებით ხშირად ფიგურირებდნენ საქართველოს მოქალაქეები. დეკემბერში პოლონეთმა 10 ქართველის დეპორტაცია განახორციელა. ხელისუფლების განცხადებით, ისინი საზოგადოებრივ წესრიგსა და სახელმწიფო უსაფრთხოებას საფრთხეს უქმნიდნენ.

კიდევ ერთი ცვლილება 22 აგვისტოდან ამოქმედდება. ამ დღიდან საქართველოს, კოლუმბიისა და ვენესუელის მოქალაქეები, რომლებსაც პოლონეთის სამუშაო ნებართვა აქვთ, პოლონეთში უვიზოდ ყოფნის პერიოდში მუშაობას ვეღარ შეძლებენ.