თბილისის ელექტრომიმწოდებელი კომპანიის (თელმიკო) განცხადებით, ჩვენებების დეტალურ ანალიზს ახორციელებენ და იმ შემთხვევაში, თუ შეცდომები გამოვლინდება, გადასახადებს გადაიანგარიშებენ. კომპანიაში ამბობენ, რომ გადასახადების კორექტირების პროცესში ელექტროენერგია არ შეიზღუდება. ასე პასუხობენ ისინი მომხმარებლებს პროტესტს, რომლებიც ამბობენ, რომ გადასახადი გაცილებით მეტი დაერიცხათ.

"შეგახსენებთ, რომ სემეკის გადაწყვეტილებით, 2022 წლის იანვრიდან შეიცვალა მრიცხველის წაკითხვის პერიოდი და ელექტროენერგიის გადახდის ვადა. აღრიცხვის ახალ მოდელზე გადასასვლელად, 2021 წლის დეკემბრის ბოლოს თელასმა მრიცხველებიდან აიღო ჩვენება, მიღებული ჩვენებების საფუძველზე, თელმიკოს მიერ მომზადდა და დაიგზავნა ქვითრები.
ჩვენების აღების პროცესში, შესაძლოა, გამოვლინდეს უზუსტობები. ამ დროისთვის მიმდინარეობს ჩვენებების დეტალური ანალიზი", — აცხადებენ ისინი.

კომპანის მტკიცებით, გავრცელებული ინფორმაცია 1 იანვრიდან ტარიფის გაზრდაზე სიმართლეს არ შეესაბამება და ელექტროენერგიის საფასური არ შეცვლილა.

ბოლო დღეებში მოქალაქები სოციალურ ქსელში წერენ, რომ მათ არა მხოლოდ დენის გადასახადის ორი ქვითარი მიუვიდათ, არამედ გადასახადიც გაეზარდათ. გუშინ, 4 ნოემბერს საპასუხოდ, კომპანიაში განაცხადეს, რომ საახალწლო დღეებთან დაკავშირებით, 31 დეკემბერს, 1 და 2 იანვარს გამზადებული ქვითრები არ გაგზავნილა, შესაბამისად, აღნიშნული ქვითრები მომხარებლებს 3 და 4 იანვარს გაუგზავნეს და ისინი დეკემბრის დარჩენილი დღეების ელექტროენერგიის ხარჯს ასახავდა.