რუსეთში უკრაინის წინააღმდეგ ომში მონაწილეობის მისაღებად მოხალისეობრივი ინტერნაციონალური დანაყოფი "გეორგიევსკი" ჩამოყალიბდა. ამის შესახებ ინფორმაციას რუსეთის სამთავრობო სააგენტო TASS ავრცელებს. მათი ცნობით, დანაყოფის მეთაური საქართველოს ყოფილი გენერალური პროკურორი და რუსეთის მხარეს მებრძოლი ომარ რომანოვ-ფარცხალაძეა.

"სწორედ რუსმა მიხეილ ეგოროვმა და ქართველმა მელიტონ ქანთარიამ აღმართეს 1945 წელს გამარჯვების დროშა რაიხსტაგზე. ჩემი თანამემამულეების ყოველი მეოთხე ადამიანი თავისუფლებისთვის იბრძოდა. დარწმუნებული ვარ, რომ, ისევე როგორც მაშინ, მტრის დამარცხების სიმბოლოს კვლავ რუსი და ქართველი აღმართავენ.

ჩვენი თანამოაზრეებისა და მხარდამჭერების მიერ, რომლებიც ჩვენი ხალხებისა და ქვეყნების გაერთიანებას, ასევე ტრადიციული ოჯახური ღირებულებების დაცვას ემხრობიან, ჩამოყალიბდა ინტერნაციონალური დანაყოფი "გეორგიევსკი", — განაცხადა მან და დააკონკრეტა, რომ სახელწოდება დაკავშირებულია 1783 წლის გეორგიევსკის ტრაქტატთან, რომელმაც, მისი თქმით, მნიშვნელოვანი როლი შეასრულა ქართველი ხალხის ისტორიაში.

ფარცხალაძის თქმით, დანაყოფის მთავარი ამოცანაა, "ბოლომდე მიიყვანოს ბრძოლა იმ ბოროტების წინააღმდეგ, რომელიც საფრთხეს უქმნის არა მხოლოდ ჩვენ, არამედ მთელ მსოფლიოს".

ყოფილი გენპროკურორი რუსულ მედიასთან ამბობს, რომ მან ნებაყოფლობით მიიღო გადაწყვეტილება, რუსეთის მხარეს მონაწილეობა მიეღო უკრაინის წინააღმდეგ ომში. ამასთან, მისი თქმით, საბრძოლო მოქმედებების დაწყებიდანვე ის თავის გუნდთან ერთად აქტიურად ეხმარება ფრონტის ხაზზე მშვიდობიან მოსახლეობას.

"დღეს, როდესაც რუსეთი დასავლეთის ზეწოლის წინააღმდეგ იბრძვის საკუთარი იდენტობის, ტრადიციების, ენისა და კულტურის შესანარჩუნებლად, მზად ვარ, დავეხმარო სამშობლოს ლიდერის მიერ დასახული ყველა მიზნის მიღწევაში", — დასძინა მან.

მის ფოტოს Telegram-ზე რუსეთში მცხოვრები ქართველი ბიზნესმენი და პრორუსული პარტია სოლიდარობა მშვიდობისთვის ერთ-ერთი ლიდერი მამუკა ფიფია ავრცელებს.

შეგახსენებთ, რომ 2025 წლის დეკემბერში საქართველოს შინაგან საქმეთა სამინისტრომ იგი ლევან ჯანგველაძის მკვლელობის ორგანიზატორად დაასახელა, რის შემდეგაც მის მიმართ ძებნა გამოცხადდა. 2026 წლის თებერვალში სასამართლომ მას ამ საქმეზე დაუსწრებლად პატიმრობა შეუფარდა.

გარდა ამისა, მას ბრალი აქვს წარდგენილი ე.წ. ქოლ-ცენტრების საქმეზეც და ამ საქმეზეც დაუსწრებლად პატიმრობა აქვს შეფარდებული.

ამჟამად ფარცხალაძე რუსეთში იმყოფება და რუსეთის მოქალაქეა, რის გამოც მისი საქართველოში ექსტრადირების საკითხი გართულებულია.