გაფრთხილება: სტატია Spider-Man: No Way Home-ის შესახებ სპოილერებს შეიცავს!

მარველის ახალი ფილმი Spider-Man: No Way Home ნამდვილად წლის ერთ-ერთი უმნიშვნელოვანესი კინომოვლენაა, რომელმაც კედლებზე მცოცავი სუპერგმირის გულშემატკივრები აალაპარაკა. ფილმის მთავარი ხიბლი ძველი სპაიდერმენების — ტობი მაგუაირისა და ენდრიუ გარფილდის დაბრუნებაა, რომლებიც ბოროტმოქმედებთან გამკლავებას ტომ ჰოლანდის სპაიდერმენთან ერთად ცდილობენ.

Spider-Man: No Way Home ტომ ჰოლანდის სპაიდერმენის ტრილოგიის დასასრულია. ჰოლანდთან ერთად 3 ფილმი აქვს ტობი მაგუაირსაც. მათგან განსხვავებით ენდრიუ გარფილდი ნამდვილად დაიჩაგრა, რადგან The Amazing Spider-Man-ს მხოლოდ 2 ნაწილი აქვს. ამის მიზეზი კი მეორე ნაწილის დაბალი შეფასება და მაყურებლების უკმაყოფილება გახდა.

უნდა ვაღიაროთ, რომ ახალ ფილმში ენდრიუ გარფილდი ნამდვილად ბრწყინავდა, რაც შეუმჩნეველი არავისთვის დარჩენილა. მალე ფანებს ენდრიუსადმი სიყვარული ხელახმა შემოეძალათ და ინტერნეტსივრცე The Amazing Spider-Man-ის მესამე ნაწილის გადაღების მოთხოვნებმა დაიპყრო.

"ენდრიუ გარფილდი საკუთარ სპაიდერმენის ტრილოგიას იმსახურებს! მოდი, გავერთიანდეთ ჰეშთეგით #MakeTASM3 რათა დავრწმუნდეთ, რომ მესამე ფილმს მიიღებს".

"ენდრიუ გარფილდი The Amazing Spider-Man-ში შესანიშნავად თამაშობს და სულ მაწუხებდა, რომ მას სათანადოდ არ აფასებდნენ. ის საკუთარი ისტორიის The Amazing Spider-Man 3-ით დასრულების შესაძლებლობას იმსახურებს".

ფანებმა სპაიდერმენის შესახებ ენდრიუს გულისამაჩუყებელი სიტყვებიც გაიხსენეს:

"სტენ ლი ამბობს, სპაიდერმენი პოპულარული იმიტომაა, რომ მისი ყველას გვესმისო და მეც ვეთანხმები. ჩემს ცხოვრებაში სპაიდერმენი მჭირდებოდა. როცა ბავშვი ვიყავი, ის იმედს მაძლევდა", — ამბობს ენდრიუ გარფილდი.

ენდრიუ გარფილდს რომ სპაიდერმენისადმი სიყვარული დღემდე არ განელებია, Spider-Man: No Way Home-შიც მშვენივრად გამოჩნდა. ვინ იცის, იქნებ ენდრიუსა და ფანების ენთუზიაზმა ბევრი ჩვენგანის ოცნება რეალობად აქციოს და ენდრიუ მარველის სამყაროში მართლაც დაბრუნდეს.

ამავე თემაზე: