ახალი წელი საჩუქრებთან და ნაძვის ხესთან ერთად, რა თქმა უნდა, გემრიელი და ნოყიერი კერძებითა და ნაირ-ნაირი სასმლით გადატვირთულ საახალწლო სუფრასთანაც ასოცირდება. სუფრას სმა-ჭამასთან ერთად მნიშვნელოვანი სოციალური დატვირთვაც აქვს: ამ დროს დიდი ხნის უნახავი მეგობრები, ნათესავები თუ ოჯახის წევრები იკრიბებიან და სასიამოვნო თუ არასასიამოვნო საუბრების მომსწრენიც ვხდებით.

ახალი ჭორების, ადამიანებისა თუ გასართობების მიუხედავად, საახალწლო სუფრაზე ორი რამ უცვლელია: სადღესასწაულო განწყობა და ადამიანთა კონკრეტული კატეგორიები, რომელთაც თავს ვერაფრით დააღწევთ.

მაშ ასე, წარმოგიდგენთ 10 ტიპის ადამიანს, რომელსაც ნებისმიერ საახალწლო სუფრაზე შეხვდებით:

1. ნათესავი, რომელიც ყოველ წელს გეკითხება: "როდის თხოვდები? / ცოლი როდის მოგყავს?"

სამწუხაროდ, ამ შემთხვევაში თითქმის ყველა უძლურია: არც ზრდილობიანი სიცილი ჭრის, არც სერიოზული პასუხი, არც თვალების დაბრიალება და არც სუფრიდან ადგომა — ის აუცილებლად გიპოვით და კითხვას რამდენჯერმე გაგიმეორებთ. თუ გაგიმართლათ, შესაძლოა, სავარაუდო სასიძო-სარძლოების სიას მაინც დააღწიოთ თავი: "ჩემი ქმრის ბიძაშვილის კლასელის და არის კაი გოგო..."

2. ნათესავი, რომელიც ყოველ წელს გეუბნება, რომ გასუქდი

წონასთან დაკავშირებული ნებისმიერი შენიშვნა უტაქტობა და უბრალოდ მიუღებელი რამაა, თუმცა მზრუნველი ნათესავები ამას "ისევ შენთვის" გეუბნებიან. თითოეულ შენს ლუკმას დააკვირდებიან და ან დიეტას გირჩევენ, ან თავს უიმედოდ გადააქნევენ.

3. "განსხვავებული" სასმისითა და მანდილოსნების სადღეგრძელოთი შეიარაღებული კაცი

სამწუხაროდ, ასეთი ტიპის კაცებს ქალებისა და ზოგადად სხვების პატივისცემა მხოლოდ ამ კონკრეტული სადღეგრძელოს დალევისას ახსენდებათ.

4. ადამიანი, რომელიც "ჯერ სახლში ხვდება და მერე ვნახოთ"

საბოლოოდ ეს ადამიანი სახლიდან ან საერთოდ არ გადის, ან 2 დღით იკარგება.

5. მამაცი მსმელი, რომელიც დილით საცივის თეფშში იღვიძებს

თანაც საცივში გაღვიძების შემდეგ გამოფხიზლებაში ვერც ბორჯომი ეხმარება და ვერც — ორი ქილა მჟავე კიტრი.

6. ტელევიზორთან ახლოს მჯდომი, რომელიც საახალწლო კონცერტებს ვერ წყდება

რა სჭირს ჩვენს საახალწლო კონცერტებს მოუწყდომელი, ეგ ცალკე საკითხია.

7. ის, ვინც "ხაზების გადატვირთამდე" ყველა ნაცნობს ურეკავს

ხაზების მთავარი გადამტვირთავი თვითონაა, მაგრამ მაგას ვერ ეტყვით, რადგან ტელეფონზე იქნება ჩამოკიდებული.

8. ადამიანი, რომელიც პოლიტიკაზე საუბარს ვერც საახალწლო სუფრაზე წყვეტს

ჩვენც ვიცით, რომ ცუდად გვაქვს საქმე, მაგრამ მოდი, ცოტა ხნით გოზინაყი ჭამე...

9. ადამიანი, რომელიც მთელი წლის უჭმელობის შემდეგ დიეტას ახლა არღვევს

და სასაუბროდ უბრალოდ არ სცალია.

10. გრინჩი, რომელიც ღამის 12 საათამდე იძინებს

გრინჩს 12-ზე ოთახში შამპანიურითაც ვერ შეუვარდებით, რადგან კარიც ჩაკეტილი ექნება.

ამავე თემაზე: